Damdawi vanga naupang thihna vangin thutkhawm ko

Damdawi vanga naupang thihna vangin thutkhawm ko
Khuh damdawi an ei avanga Madhya Pradesh leh Rajasthan-a naupang eng emaw zat thihna thleng nia sawi chungchangah union health & family welfare ministry chuan Pathianni khan state leh union territory health secretary-te nen thutkhawm a ko.
Union Health Secretary Punya Salila Srivastava-a kaihhruai thutkhawmah hian vantlang himna atana chak taka hmalak leh ngaih pawimawh a tul thu a sawi.
Madhya Pradesh-ah hian naupang 16 an thi a, Chhindwara-ah 14 leh Betul-ah pahnih an ni a, Rajasthan-ah Bharatpur leh Sikar-ah pakhat ve ve an thi bawk.
Union health secretary chuan Rajasthan-in rang taka hma an la chu lawmawm a tih thu a sawi a. State dangte pawh ruahmanna siam chak tura tiin a bikin naupang leh nau pai laite himna ngaihtuah tha turin a chah.
Rajasthan-ah hian in dinah lutin damdawi him hman kawngah awareness campaign an huaihawt a, khuh damdawi rinhlelhawm an khap a, sample an lak an endik a, a chhui tur technical committee an din nghal.
Rajasthan Additional Chief Secretary for Health, Gayatri Rathore-a chuan khuh damdawi rinhlelh ber chu khap nghal a ni tih a sawi bawk.
An thenawm, Uttar Pradesh-ah pawh naupang thi an awm nia sawi a ni a, drugs department-in an chhui nghal a. Tamil Nadu-a M/s Sresan Pharmaceutical siam, COLDRIF Syrup chu a him lo bera ngaihna a awm atangin thuneituten an company siam dangte nen an man nghal vek.
Damdawi dawr leh damdawi ina khuh damdawi dangte pawh sample lain endik nghal a ni a, a siamna hmuna propylene glycol sample pawh endik a ni.
Uttar Pradesh-ah hian Medical Supplies Corporation chuan hetiang damdawi la kawlte hralh chhuah a khap vek a, chemist-te pawh rinhlelhawm an hriat chu sawi chhuak zel turin an ti bawk.
Maharashtra Food & Drug Administration (FDA) chuan Pathianni khan Coldrif syrup, Batch No. SR-13 chu hralh, sem leh hman khapna a tichhuak ve bawk.
Union health ministry chuan damdawi siamtute chu dan zam an pel a nih chuan an license chhuhsak an nih tur thu a sawi a. State tinte chu khuh damdawi bikah fimkhur zual turin a chah.
Madhya Pradesh-a Jabalpur district thuneitu leh health department chuan Coldrif sem darhtu, Kataria Pharmaceuticals kudam an kalhsan nghal a. Hetih lai hian doctor leh chemist-te chuan damdawi siamtute chu ngun zawka ena an laka khauh zawk an phut thu an sawi.
Politics hruaitute chuan chhui fiaha na taka hma lak an duh thu an sawi hlawm a. Congress hruaitu, Sachin Pilot-a chuan thihna chu chhui fiah ngei a duh thu sawiin Congress chuan an state-a naupang hriselnaah buaina a awm mek laia Madhya Pradesh Chief Minister Mohan Yadav-a’n Assam a tlawh daih an dem thu an sawi bawk.