Dampa bial mamawh chhanna chu Congress candidate-ah a awm vek – Zodintluanga

Dampa bial mamawh chhanna chu
Congress candidate-ah a awm vek
– Zodintluanga
Dampa bial chu hnam hrang hrang inchenpawlhna a nih avangin bialtu MLA chak leh thothang tha, tawnhriat ngah tawh a mamawh a, chu mamawh chhanna chu an candidate John Rotluangliana-ah a awm vek tih Congress hruaitu Zodintluanga chuan a sawi.
Dampa biala an party tana campaign mek MPCC adviser Zodintluanga chuan, Dampa bial tan hian Congress candidate vote mai chu a tha in a him ber tih sawiin, “Kan candidate Pu John Rotluangliana hi mi chak, mi viak tha, mahni bial vei tlur chi a ni a. Kum 2028 a tla mai tawh tur lo vote tlin ai chuan, kum 2028 Congress sawrkar thara minister ni zui mai tur lo vote tlin kha a finthlak zawk tih Dampa bial mipuiin an hriat ka duh a ni,” a ti.
ZPM chu an hotu lu ber atangin sawi loh ang zela awm an ni tih a sawi a. Pathian thu nen thiam takin lei an bat ve ngai hauh loh tur thu sawi mah se, Mizoram-a sawrkarna chelh tawh zinga leiba ngah ber an ni mek tih a sawi.
“June 30 thleng khan an leiba hi cheng vaibelchhe 4311.45 a ni. Sawrkar kumthar tum hnih ZPM hian an hawng ve tawh a, 2024 sawrkar kumthar kha leiba nuai 38989 in bul an tan a, 2025 sawrkar kumthar phei chu leiba nuai hlir nuai 1.4 chuangin bul an tan. Leiba chungchang ka sawi hi titi na emaw, mi sawi mai mai a ni lo, Mizoram budget document atanga lakchhuah a ni,” Zodintluanga hian a ti.
By election-ah ruling party vote kher chu mipui bat a ni lo tih sawiin, ZPM candidate chu lo thlangtling ta pawh nise, tuna an sawrkar, kum 2028 a tla zui tur hi a nihna tur angin a thi beh pha chin an inrem khat vek tawh tih a sawi. “MLA thar tan dinhmun tha emaw dinhmun duhawm inpek tur an nei tawh lo. Chumi piahlamah MLA an neih belh chuan a inluling a, inti lal tur an tam phah mai mai,” a ti.