Dampa biala chak tumin kan rawn campaign pui – Union MoS

Dampa biala chak tumin
kan rawn campaign pui
– Union MoS
Dampa bial by election-ah chak ngei tumin BJP candidate an rawn campaign pui a, BJP chuan eng inthlan pawh nise chak tumin thapui a thawh thin tih Union minister of state Dr Jitendra Singh chuan a sawi.
Dampa bial inthlan atana BJP tana campaign tura zan riaka Mizoram rawn tlawhtu Union MoS for Prime Minister Office Dr Jitendra Singh hian Nilaini tlai khan Aizawlah thuthar thehdarhtute a kawm a. Zawhna chhangin, Dampa bial by election ah chak ngei an inring a, chumi atana rawn campaign pawh an ni tih a sawi.
BJP kaihhruai sawrkarna hnuaiah India chu khawvel ram economy thaah pali-naah a kai tawh tih a sawi a. Sawrkar hmasaten an hlamchhiah khaichhuah chu Modi kaihhruai sawrkarin a tum ber a ni a, chuvangin hmarchhak state ho pawh ruahmanna hrang hrang siamin an dawmkang mek tih a sawi.
“Hemi ah hian Mizoram pawh tel ve ngei se kan duh a, centre thlawpa tha leh chak taka thawhpui theih tur state-ah sawrkar neih a ngai. Chutiang chu Nagaland, Arunachal Pradesh leh Sikkim-ah pawh kan hmu mek,” a ti.
Hmasawnna hna a chak theihnan ‘double engine’ a kal a ngai a, tunah chuan pakhat leh a chanve engine ang vel a ni tih Union MoS hian a sawi.
Sawrkar laipuiin thalai tinzawn, hmeichhe tinzawn, loneitute tinzawn leh miretheite tinzawna ruahmanna tha tak tak a siam chu state-a sawrkarin a thlawp that loh chuan hma a lak chak theih loh tih a sawi a. Sawrkar laipuiin BJP sawrkar lohna pawh nise a thiarhrang chuang lo chungin, tha taka a thawhpui theih state-ah chuan hmasawnna a chak nge nge zawk tih a sawi a ni.
A ministry chan hnuaiah hmarchhak leh Mizorama hmalakna tur a awm a, a bikin bio technology lamah hman tangkai leh haichhuah tur a tam a, ruahmanna a awm tih Union MoS for Science & Technology hian a sawi bawk