Mizoram sawrkarin Dampa Tiger Protection Force hlawh a batsak zawng zawng pe nghal turin an phut tih Congress Thalai chuan an sawi.
Congress Thalai Hqrs. thuchhuak chuan, Dampa Tiger Protection Force ten thla ruk hlawh an lak tawh loh thu an hriatin a lainat takzet tih sawiin, Mizoram sawrkarin an hlawh a batsakte a bo a bang awm loa a rang thei ang bera pe tura an phut thu leh, a tihlawhtling thei lo a nih chuan an thlavang hauhin hma an lak tur thu a sawi.
‘Hlawh batsak an nih chhan hi zirchianna atanga a lan danin, Mizoram Finance department lamin Dampa Tiger Reserve field director account-a pawisa a pek har vang leh EF&CC department-in 1st instalment a hmanna leh a hman chhuahna (utilisation certificate) central lama an thawnthlak har vang a ni a. Mizoram sawrkar Pu Zoramthanga kaihhruaiin sum a enkawl thiam loh vang leh an inthlahdah vang a ni a. Central atanga sum lokalte a hmanna tur dik tak ni lo, thildanga hman leh pawh penin a hrin chhuah harsatna a ni,’ a ti.
Dampa Tiger Protection Force ten an hlawh an lak theih loh avangin Dampa Tiger Reserve chu tunlai hian tih chereu mek a ni tih Congress Thalai hian sawiin, ‘Duty an awm loh avangin a ruka sapel leh lui kal an pung thar hle nia sawi a ni a. Sawrkar tha lo leh a ngaihna hre lo hnuaiah Mizoram rohlu Dampa Tiger Reserve kan chan mek hi a lungchhiatthlak hle a. An enkawl zo ngang lo a nih chuan tlawmah la loa a ngaihna hria leh sum enkawl thiam Pu Lalsawta leh a thawhpuite hi rawn hreh lo turin Finance minister Pu Zoramthanga leh EF&CC minister Pu TJ Lalnuntluanga te kan chah a ni,’ a ti.
Dampa Tiger Reserve vengtute hlawh pe turin sawrkar kan phut – MPYCC
![](https://theaizawlpost.org/wp-content/uploads/tap_logo-min-large.jpg)