‘Compensation hnam’ kan ni lo va; mahse, dik lo taka compensation la duh an awm. ‘A huhova dan bawhchhiat hreh loh hnam’ kan ni lo va, chutiang hnam hming pu chu an la awm lo bawk; mahse, Krismas leh Kumthar vuakvetah erawh a huhova dan bawhchhiatna a thleng nasa thin hle a, dan bawhchhiatna hi a la tawp thei lo; a hnam hming ang ema inputtir erawh a rem chuang lo.
Mi tlemte an ni, hetianga dan bawhchhe thin hi. Aizawlah mihring nuai li vel kan awm tawh, Krismas leh kumthar vuakveta khap thil – halpuah/halmawi haltute hi mi 5000 pawh an tling lovang, chu chu Aizawl mihring zat atanga chhutin 1.2% vel chauh a ni. Chumi awmzia chu, mihring za awmkhawmnaah buaina siamtu mi pakhat (1.2) zel awm ang a ni a, chu chu midang 98.8 ten kan hneh lo thin tihna a ni mai awm e.
Sawrkar thar hian kalphung thar a hmachhuan a, aikal lak a titawp a, ‘ram inneihsiak’ tihtawp tumin hma a la leh mek a. Tunah, a huhova dan bawhchhiatna thleng thin tihtawp tumin hma a la leh mek bawk.
Krismas (2023) leh kumthar (2024) lawmnaah khan namen lovin, kum dang zawng aia uarin halmawi/halpuah/sky lantern etc. hal a ni a. Sawrkar thar khan khapna chu a tichhuak tho, mahse tun anga inbuatsaihna hun thawl a la nei hman lova, sawrkar thar runluih chak te pawh an awm em ni ang tih hial a nih kha.
Tunah chuan inhmakhawsuihna hun thawl a awm ta bawk a, hmalakna pawh a tha thawkhat a tih theih awm e. A engamah hmain halpuah lam chi cheng nuai 20 chuang hu man chhuah niin, inhmanhnawihte pawh jail lamah an thawn nghal nghauh nghauh tawh bawk. Heti chung pawha halpuah/halmawi lo hal talh an awm a nih chuan, sim vang vangna thama inpen lawlh lawlh a tul tawh tihna a ni ang a, ‘No Tolerance’ kalpui a nih loh chuan, a lehpekah pawh ‘a ngai te bawk’ kan ti leh mai awm e.
He thil titawp tur hian sawrkar leh pawl tanhona ringawt a tawk lo tih chu hun kal tawhah kan hmu tawh; chuvangin, halpuah/halmawi hal duh lo mipuite hian sawrkar leh pawl thawhhona tha tichak tura awmhmuna theihtawp kan lo chhuah ve a ngai takzet tawh.
A huhova dan bawhchhe chunga kan sakhaw hun pawimawh hman liam leh rikngawt thin hi chu, kan hnam tih atan a inhmeh lo a ni e.
Dan bawhchhetute chhiarkawp…
