Kum sarih liam taa Manipur tlangmiten nasa taka an dodal ‘3 Bills’ tia hriat hlawh (Protection of Manipur People’s Bill, 2015, Manipur Land Revenue and Land Reforms (Seventh Amendment) Bill, 2015 leh, Manipur Shops and Establishments (Second Amendment) Bill, 2015 te kha nasa taka dodalna karah passed a ni a. Heng dan thar pathumte hi Meitei-te humhalh bikna dan leh tlangmite neksawrna a nih avangin dodalna pawh a nasa a, thisen a luang a, nasa taka buaina chhuah phahna kha a ni a.
Hun a lo kal zel a, kumin March thlaa Manipur High Court-in Scheduled Tribes list-a Meitei community telh tura hma la tura Manipur sawrkar a hriattir avangin, hemi duh lova Naga leh Kuki-Zomi tribes ten muanawm taka duhlohna an lantirna chu a lehlam Meitei lamin ralthuam nen beiin thisen chhuahna leh a nghawng dang rapthlak tak tak a thleng zui ta ngar ngar a ni a. India ram pa ber chan chang Prime Minister chuan, India ram state pakhata thisen chhuahna rapthlak tak leh sakhaw zalenna ramah biak in inhalsakna nasa tak leh, state mipui 2% zet raltlana state thenawm an pan chu chum tawh hnuah pawh, thu kam khat pawh chhak chhuak duh lovin, ‘Manipur a kang’ (Manipur is burning) tia khawvel chanchin thar puangtuten an puang dum dum chung pawhin ngawih a chuh tlat a. Hei hian, politics thila dinhmun chhiat hlauhna avanga khua leh tuite tawrhna pawh hai der duh tlat prime minister India-in a nei, tih ngaihdan neih loh theih lohna a lo hring chhuak ta a ni.
Tun Monsoon Parliament Session-ah pawh, India hmarchhak state-te nekchepna tur dan thar (The Forest Conservation (Amendment) Bill 2023 chu nasa taka dodalna karah passed a ni leh ta a. He dan siam thar pawh hi northeast state-te nekchep chunga hawl darhna tur niin a lang. Dan anga hmalakna a han kal dawn ang a, dodalna a awm ngei ngei dawn; chu chuan chanchinthar puanzarna lamah “Northeast is burning” tih thupui a siam lovang tih sawi theih a ni ta lo. Thiam taka dan hmanga innekchepna lam hi sawrkar laipui hian a kalpui hret hret chu a ni ber e.
Dan hmanga innekchepna
