MLA Er. Rohmingliana chu Assembly Committee report, House-a thehluh tur, thehluh a nih hmaa lo tih darhah puhin ZPM Legal Board chuan chhuichiang a, a tul anga a chunga hma la turin Assembly speaker an ngen.
ZPM Legal Board hian Thawhlehni khan Assembly speaker hnenah MNF MLA Er. Rohmingliana’n 2025 December 22-a ‘Assembly Committee on Petitions’ aiawha report/ recommendation a thehluh chungchangah Legislative Assembly dan kalh leh tih dan phung pelin report a thehlut nia sawiin, a thehluh dawnah media mite koin report diklo a pe nia a lan avangin, House member-in a thuneihna leh chanvo pela thil a tih leh tih loh chhui tura ngenna an thlen.
An thu thehluhah hian, Rules of Procedure and Conduct of Business kalhin House member hian Committee report, House-a thehluh a nih hma, thu la tihdarh lo tura vawn ngai chu media sawmin a tidarh a, media hnena a thu rawlruk pawh hi thu dik tawk lo a la ni cheu tih a sawi a ni.
Speaker hi Committee on Privileges hnenah he an thu thlen hi hlanchhawng a, chhuichian tir a, dan bawhchhiat a awm a nih chuan a bawhchhetu House member hi a tul anga zilhhau emaw chawlhtir emaw thlenga hma la turin an ngen tih a sawi. Hei hi State Legislative Assembly zahawmna vawnhimna atan tih ngei a tul tih a sawi bawk.
Dan kalha thu tih darh vangin MLA chhui turin ZPM-in speaker an ngen
