Tunhma atang tawhin, kumtlinglo naupang harsatna tawkte nihna leh anmahni hriatchhuah theihna reng reng chanchinthar lama puanzar Danin a khap thu leh, Dan bawhchhiate chu hrem theih an nih thu hi, naupang dikna leh chanvo humhalhtu pawl CWC leh MSCPCR te’n vawi tam tak mipui hnenah an lo puangzar tawh thin a. He dan hian bawhchhiat a hlawh thin a, mahse thuneitute lamin ‘dan zawm tura inzirtirna kalpui hun’ (grace period) nei chungin ngaihhnathiamna thui tak nen, dan bawhchhetute chu ti tawh lo tura hrilhin awareness an neihpui nghal thin a. Chu chu kum tam tak kaltaah khan a ni.
Vaihlo khapna dan COTPA (The Cigarettes And Other Tobacco Products (Prohibition of Advertisement And Regulation of Trade And Commerce, Production, Supply And Distribution) Act, 2003) pawh sawrkar laipuiin a siam atanga kum 10-na velah a takin kan kalpui thei chauh a, a chhan pawh India rama vaihlo leh a kaihhnawih khawih nasa ber state kan nih avangin awareness neih chhung a rei a ni. Tunah chuan puipunna hmuna zial zu hmuh tur an awm ta mang lova, zial zu thinte pawhin mipui zinga ‘khuk luai luai’ an inthlahrung ve tawh a, hei hi khauh zawka Dan kenkawh a nih tak vang a ni ber awm e.
COTPA dan hnuaiah hian zirna in (educational istitution) atanga yard 100 (feet 300) huam chhungah vaihlo leh a kaihhnawih lam chi reng reng zawrh leh hralh khapna (COTPA, 2003 Section 6b) a awm bawk a. Hei pawh hi hmun thenkhatah chuan zawm ni ve tawh mah se, zawm lohna hi a tam zawk fe a la ni. Tunah hian sawrkar chuan zirna in hungna atanga feet 300 bial chhung hi rawng eng hmanga chhinchhiah hna a thawk mek a, a lawmawm hle a; hei pawh hi khauh taka kenkawh zui a pawimawh dawn hle a ni.
Dan hi kenkawh that a nih chuan Mizote hian dan hi kan zawm tha viau zel. Tuna Mizoram larna pakhat ni mek ‘traffic discipline’ pawh hi, a kengkawhtu lamin an kengkawh tha bawk a, mipuiin kan thahnan tawh a nih hi. Ram changkangah chuan dan an zahin an zawm tha kan ti leh mai thin a, hei hi a chhan chu, dan kengkawhtuten Dan an kengkawh tha a, mipuiin dan zahna leh pawisakna an thanhnan ta thin a ni.
YouTuber-te hian an thawh hlawk hle a, chanchin thar leh thu tha tak tak awlsam leh rang zawkin mipuiin kan hriat theih phah thin a, hei hi a lawmawm em em rualin, viewer ngah duh luat vanga Dan pela thil lo ti duh thenkhat an awm thin hi a pawi hle a. Mizo film siamtute zingah pawh, COTPA dan bawhchhia an la awm thin. Hengte pawh hi thuneitu leh dan kengkawhtute hian ngawrh deuh zawkin han bawhzui se, kan ziaawm thuaiin a rinawm.
