Home minister K.Sapdanga chuan dan leh hrai kenkawh kawngah mipuiin sawrkar an rin ngam nan thawh a duh tih a sawi a; chutiang tur chuan hmachhawp a nei a, chumi tihlawhtling tur chuan YMA-in pawimawhna a neih avangin thawhhopuiah a sawm tih Central YMA Central Executive Committee thutkhawm a telpuinaah a sawi a.
Dan kenkawh kawngah hian, legal sanction nei ve lem lo YMA hi a thawh hlawk hlei hlei an ni mai awm e. Sawrkar hnuaia dan kengkawh tura thuneihna pek heng police leh a kaihhnawih dangte hian an hna leh tihtur chu an thawk mawlh mawlh ni tin a, chuti chung chuan dan bawhchhiatna hi a thleng reng a. Law enforcement lam chakin indaih viau thin mah se, dan bawhchhiatna hi chu Eden huan atanga lo intan tawh a nih miau avangin dan zawm famkimna ram hi khawvelah hian a awm theih loh, a tih theih awm e.
Ram changkang zawkah chuan dan kengkawhtuten dan an kenkawh that avangin dan bawhchhiatna a tlem ti zawngin a sawi theih ang a. Dan awm reng si, kenkawh that si loh hnuaiah chuan mipui an inthlahdah thuai a, dan kalha thiltih pawh ngaiah an nei vat mai. Hetiang hi Mizoramah a thleng thin. Entirna mawl tê han tarlang ila: District bawrhsap-te hian leivung paih khapna dan an tichhuak thin; chu chu media hrang hrangah mipui hriat turin puanzar a ni thin a. Mahse, dan kengkawhtuten an vil zui that loh avangin dan bawhchhiatna a thleng reng tho. Indaihlohna chhuanlam chunga thlir liam mai lova mipui nena thawhho dan zawn mai kha harsatna sutkianna tur tha tak a nih a rinawm.
Dan kenkawh kawngah hian sawrkar tha chakna ringawta tih theih loh tam tak a awm a, chutiangah chuan khawtlang nena tanhona hi a pawimawh zel dawn niin a lang.
Dan kenkawh
