Daily Newspaper

Dan loa che Assam Rifles chunga action lak phut

6

Tunhnaia Mizorama dan loa Assam Rifles chet danah Zo Indigenous Forum chuan dan bawhchhiate chunga action lak a nih loh chuan thuneitu sang zawka thlen zel an tum tih an sawi.

Zo Indigenous Forum thuchhuah siam danin September 12, 2020 chhun dar 12 vel khan, 17 Assam Rifles major pakhat chuan Mizo driver pahnih – Lianfuha (24) s/o T Manghrina, Pangkhua leh Kapremthanga (35) S/o Kimnona, Sangau-I Zion Veng, Lawngtlai district ve ve chu Hrangchalkawn bulah nasa taka kut thlakin Kapremthanga phei chuan a bengah harsatna a tawh phah a. Assam Rifles dangten an thelh ngai hial khawpin a che niin a tarlang.

Pawisawilote khawihtu major hi a rang thei ang bera a chunga dan anga action la turin Assam Rifles thuneitute kan phut a ni,’ a ti.

August 15, 2020 tlai dar 4 vel khan Assam Rifles-ten Sesih khua, Champhai district-ah hmeichhe pahnih chungah mawi lo tak leh an zahawmna tibawrhbang zawngin an che tawh bawk tih sawiin, ‘He thil thleng avang hian Champhai Police Station-ah thubuai ziahluh a ni a. Zo Indigenous Forum chuan Mizoram State Commission for Women-ah August 20, 2020 khan complaint a thehlut a. Pawikhawihtu chunga action lak a nih theihna’n 23 AR Hqrs DIG hnenah September 9, 2020 khan Warrant of Arrest tihchhuah a ni tawh bawk. Tun thlengin heng mite chunga action lak thu hriat ala ni loa, rang taka an chungah dan anga hma la turin thuneitute kan ngen a ni,’ a ti.

Mizoramah remna leh muanna a awm hnu atangin buaina engmah tawk loa kan awm laiin, Assam Rifles-ten mipui tan harsatna an lo siam fo tawh thin tih Zo Indigenous Forum hian sawiin, tunhnaiah AR-ten Mizoram sawrkar ruahmanna leh mipui himna ngaipawimawh duh loa Vairengte check gate an paltlang luih tawh bakah nikum lamah Vathuampui khua, Lawngtlai district chu tuma tlawhpawh theih lohin an khua an lo hreng tawh tih a tarlang bawk.

Mizorama awm Assam Rifles-ten dan pawisaloa an chetna hrang hrang chu hriatthiam harsa an tih thute, rambuai lai ang maia mipui chunga an duh duha an che thin chu rambuai emaw an la ti nia a lan thute, Mizoram chu ‘disturbed area’ a nih tawh loh thu leh Armed Forces Special Powers Act (AFSPA) 1958 chu Mizoramah hman a nih ve loh thute Assam Rifles hi an hriattir tih an sawi.

Heng pawikhawihna thlengte hi Mizo mipui zahlohna leh an dikna chanvo palzutnaah a ngai tih Zo Indigenous Forum hian sawiin, ‘Thuneituten an chungah hma an la lo a nih chuan National Human Rights Commission, National Commission for Scheduled Tribes, National Commission for Women leh United Nations hnen thlengin hma kan la dawn tih kan hriattir a ni,’ a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy