Mizoram Synod-in dan loa hnamdang sumdawng tihrem kawnga hma lak a tumna chu an thlawp tih Mizoram Merchant Association (MIMA) chuan an sawi.
MIMA hruaitute hian Nilaini khan Synod senior executive secretary Rev C Zorammawia an hmu a. Nikuma Synod Inkhawmpuiin Mizorama hnamdang dan loa sumdawng tih rem chungchang a lo pass tawh chu lawmawm an tih thu sawi pahin, rawtna an neih an thlen. Synod meuhin Mizoram leh Mizo hnam himna kawnga pawimawh em em, ‘Mizorama hnamdang dan loa sumdawng tihrem tuma hma a lak chuan hlawhtlinna a hmuh ngei an ring tih sawiin, a tulna apianga tawiawm an inhuam reng tih an hrilh a ni.
Mizoramah hnamdangin sumdawnnaa min chimral mek thu te, keimahni a Mizo ngeiten hming hawhtira hnamdang dawr hawn theihnana hma laksak thin an awm chu pawi an tih thu te MIMA hian an sawi a. Mizo hming hawhtir thenkhat pawh an hming hawhtir ten chhiah an pek that loh avanga buaina tawk sawi tur an awm thu leh, a buai zawka chu hming hawhtirtute bawk an nih avanga fimkhur hle a ngaih thute an sawi bawk.
Kan hnam venhimna atana dan tha tak awm, 2 years validity ILP hmang tha ngam loa kan awm chu pawi an tih thute, ILP chu hnam himna atana hman tangkai a nih theihnan ennawn nise an duh thute sawiin, Mizorama himna zawnga lo lut, foreigner-te an duh duha dawr an siam chungchang pawh ngaihtuah a tul thu an thlen a ni.
‘Hun reiloteah Mizoramah rel lo lutin, kawngpui lianpui pui ala thlur sung dawn bakah lawng lian thlengin a lo thleng dawn a, tuna economic-a min chimral mek tawh dan ngaihtuah chuan, chu’ng hun a lo thlen hun chuan economic assimilation a thlen ngei kan ring,’ tia sawipuiin, sakhuanaa inchimral hi chu a thleng mawh viau a, economic assimilation erawh inchimralna awlsam tak a ni tih te an sawi.
Synod senior executive secretary hian Mizorama hnamdang dan loa sumdawngte tihrem dan chungchanga hma latu tur an ngaihtuah dan a lo hrilh a ni.
Dan loa hnamdang sumdawng tihrem tumnaah Synod thlawp
