Lunglei district huamchhunga sawrkar hriatpui loh dan loa khaw din awmte, lo enfiah tawh leh bawhzui loha awm zui ta chu enfiah nawn a ni dawn a, hemi chhung hi chuan sawrkar department ten hmasawnna hna leh sawrkar scheme kalpui lo tura hriattir an ni.
YMA Khawthlang-tuipui Group chuan kumin May 3 khan thuchhuah siamin, an huamchhungah dan loa khaw din – Zohmun, Lare Veng, Letisury, Khojoysurychhuah, Bornasury, Chandobighat, Dursury, Saisen, Nakuksora, Gurusora, New Balukiasury, Balukiasury-chhuah leh Bandiasora-a chengte chu kumin June 14 hma ngeiin an khaw hmasa – parent village-ah let leh turin an hriattir a. He hmun hi Lunglei district Tlabung Sub-Division huamchhung amite niin, Thawhlehni khan Lunglei additional DC Donny Lalruatsanga kaihhruaiin Lunglei SP Rahul Alwal, DLAO leh a kaihhnawih department dang – P&E, PHE, H&FW, RD, EF&CC, I&PR leh School Education officials-te bakah Sub Hqrs YMA Lunglei, Lunglei District Village Council Association leh Khawthlangtuipui Group YMA hruaitute an thukhawm a ni.
Addl DC chuan dan loa khaw din chungchang chu sawrkarin a ngaipawimawh hle tih sawiin, kum 2019 khan Joint Inspection Team din a ni a, chipchiar taka enfiah a ni a, Covid-19 hrileng vangin hmalakna tihtawp lailawk a ni tih a sawi. Hemi kawnga hmalakna hi uluk leh fimkhur taka kalpui zel a ngaih thu leh mihring dikna chanvo (human rights) bawhchhe lo zawnga kalpui a tul thu a sawi a ni.
Dan loa khaw din enfiah dawn
