Daily Newspaper

Dan loa tlana sawi, dan loa kutthlak vangin suspend

12

Truck khalhtu pakhat, traffic dan bawhchhia nia sawi chu dan lo bawkin police-in kut a thlak avangin police hi suspend a ni.

Thudawn danin, Pathianni chhun dar 12.30 vel khan Bawngkawn Traffic Point tlantlangin truck MZ-01 3320 chu Bawngkawn – Ramhlun Road ah a tlan a, he kawng hi truck tlan tlang lai hi ‘no entry’ hun ala ni tiin, Bawngkawn traffic point-a duty traffic police-te chuan ding turin an ti a; a ding lo a, Ramhlun Industry penga traffic police duty-ten lo tidingin let leh turin an ti a; a let leh ta nia sawi a ni.

Amah hi ration buhfai phur, Champhaia load dah zo, Aizawla let leh nia thu dawn a ni. Bawngkawn traffic point a thlen leh hian traffic police-te nen inhnial buai deuhin hemi thawm hria Bawngkawn Police Station-a duty thenkhat pawh traffic point-ah hian an kal a, truck khalhtute nena thu inhmu fuh lo deuh karah truck khalhtu hi police lam atangin kut thlak a ni a. Hemi lai hi mobile phone hmanga latu an lo awm a ni.

Truck driver kut thlak thu ah hian truck driver-te chu lungawiloin Pathianni chawhnu la la khan Bawngkawn Police Station leh a chhehvelah dingin kawng dan an tum thawm a ri zui a. Bawngkawn P/S hmaah an pungkhawm bawk.

Mizoram Truck Driver Association chuan hma la zuiin police hotute nen an inbia a, MTDA hian truck driver khawihtu Mizoram police constable leh traffic police constable chu dan bawhchhiaa puhin suspend an phut a ni.

Hemi ang hian Mizoram police constable, video-a laka a lan dana, truck driver pet a hnek bawktu chu September 20 zan la la atang khan Aizawl SP chuan suspension order tichhuak nghalin, suspend a nih chhanah, ‘chhan leh vang tha tawk awm loa mi kutthlak’ tih a ni. Order-ah hian suspend hun chhung tarlan a ni loa, suspend a nih chhung hian Aizawl chhuahsan lo tura tih a ni.

“An pahniha suspend hi kan phut ngei a, mahse Bawngkawn khawtlang hruaituten ban pharin inremna kawng siam dan dap a ni a, traffic police (kut thlaktu ni chiah lo) chu tel loin Bawngkawn P/S a duty police constable suspend chu a tawkah kan ngai ta a ni,” tiin MTDA hruaitu atanga The Aizawl Post thudawnna chuan a sawi.

Police lam sawi danin, Bawngkawn – Ramhlun Road hi zan dar 7.00 hma chu lirthei lian tan tlan phal loh ‘no entry’ a ni a, he truck MZ-01 3320 hi Pathianni khan chak taka tlantlangin ding turin hamrik nena auin an hrilh a, a din loh avangin bike-in a umzui a, pass pawh pe duh loin Ramhlun Industry penga traffic police duty ten an lo tiding ta niin an sawi.

“Truck khalhtu hian essential commodity phur a nih thu a sawi vawng hle a, a tawngkam a chaltlai,” police lam chuan an ti.

Hetihlai hian MTDA hruaitute chuan ‘no entry’ thu hi an lo la hre ngai lo niin an sawi a. Tawngkama inhnial chu a awm a nih pawhin tawngkam vek chu a tawp na ni tura an ngaih thu leh, dan loa kut inthlak khawp thleng chu an hriatthiam loh thu an sawi ve thung a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy