Daily Newspaper

Dan loin a rukin sawrkarin zirtirtu 154 a la – NSUI Mizoram

16

Mizoram sawrkarin kumin kumtir khan advertisement chhuah lo leh appointment letter pe loin zirtirtu 154 a la niin National Students’ Union of India: Mizoram State chuan an sawi a. Heng zirtirtu lak hi chawlhtir vek a, dan ang taka zirtirtu qualified ngei la tha leh turin sawrkar an phut tih an sawi.

NSUI Mizoram State thuchhuah tarlan danin, kumin – 2021 kumtir lam khan government high school 95, RMSA high school 4 leh lumpsum grant -in- aid high school 1, a vaiin high school 100-a thawk turin zirtirtu 154 a rukin lak an ni a. Heng zirtirtu lakna tur hian advertisement chhuah a ni loa; tu lak nge an nih tih pawh hriat a ni lo a, appointment/ engagement letter pawh pek an ni lo. Tuten emaw an thawhna tur high school-ah joining report pe turin an hrilh a, an hrilh ang chuan joining report an pe tawp a. High school lam pawhin an zirtirtu thar neih chu lawm takin an lo thawhtir ve mai niin a sawi.

Joining report hi an bialtu district education officer hnenah an thawn ve leh a. Chumi zarah chuan DEO-te pawhin an district chhungah zirtirtu thar an awm tih an lo hre ve ta chauh a. Heng zirtirtu lak zingah hian thenkhat chu high school zirtirtu atana qualified lo te an ni, tiin a sawi bawk.

Hetianga mumal lo taka zirtirtu lak a ni hi a dik loin a pawi takzet tih sawiin, sawrkar sum hmanga hlawh pek tur an nih chuan engtin nge Finance Department pawhin an hlawh tur a pek ang tih chu ngaihtuah tham leh enzui ngai takah an ngai tih a sawi a ni.

‘Mahni duhsak zawngte hnaa thunluh nana zirna in hmang lo turin Mizoram sawrkar kan phut a. Heng zirtirtu lak thar, mi 154 te hi an hna atanga chawlhtir vek tur leh zirtirtu hi dan ang taka advertisement chhuaha qualified zirtirtu ngei la tha leh turin sawrkar thuneitute kan phut a. Ban tir an nih a, lak that an nih loh chuan a tul angin hma kan la zel dawn a ni,’ NSUI (Mz) thuchhuah chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy