Dan lovin mi malin sipai ram acre 2,024-a zau luah
Sorkar laipui chuan sipai ram acre 75,629-a zauvah mi malin an luah chu acre 2,024-a zau a nih thu leh dan ni lem lova lo atana hmanga miin an neih acre 1,575-a zau a awm bawk tih Nilaini khan Supreme Court a hrilh.
Justice Surya Kant leh Joymalya Bagchi te thutna bench hnenah Attorney General R Venkataramani leh Additional Solicitor General Aishwarya Bhati te chuan sorkar aiawha thlenin heng dan lova ram luah/hmante um chhuak tura hma lak dan pawh an thlen tel.
Court chuan sorkarin ram luahtute um chhuah hna kalpui tura committee a din thar hmanga hma an laknate chu thla hnih chhunga thlen leh turin a ti nghal.
Defence ministry-in court-a report a thehluhah hian acre 819-a zay chu state leh sorkar laipui hnuaia department leh an hnuaia miten vantlang tan an hmang tih tar lan a ni a. Hengte hi kawng kaltlangtir nan te, sikul hmun atan te, vantlang intihhlimna hmun atan te, bus sinna atan leh thil dang atana hman a ni.
“Defence ram hi acre 75,629-a zau awmin Defence Estates Organisation-in a then angin Class A-2, B-3, B-4 leh C a ni a. Heng zinga acre 52,899 vela zau chu cantonment huam chhung niin acre 22,730-a zau chu cantonment pawn lam a ni a. Acre 2,024 chu mi malin an luah a ni,” tiin affidavit-ah hian tar lan a ni.
Sorkarin affidavit a thehluh hi kum 2014-a NGO Common Cause-in public interest litigation (PIL) a thehluh hnua court-in a ngaihtuah hnua thlen a ni.
Miin sipai ram an luah tur venna kawngah ministry chuan Defence Estates Organisation (DEO)-in ven hna hi thawkin ramri a hung a, miin an luah mai theih bik phei chu nasa lehzuala hung a ni.
“Kum 10 liam ta chhung khan acre 1,715-a zau, DEO hnuaia awm chu Defence Estates Department-a CEO leh DEO-ten an paih a. Tun kum kal mekah hian technology changkang hmangin CoE survey neih niin tual chhung sorkarte pawhin min pui a, acre 220 chuanga zau miin an luah chu chhuhsak an ni,” a ti.
Kum 2014-a court sang berin PIL thehluh a ngaihtuah tan khan CBI chu dan lova sipai ram luah leh hman chhui turin a lo ti tawh bawk a ni.
Dan lovin mi malin sipai ram acre 2,024-a zau luah
