Mizoram Legislative Assembly thutkhawmah state-a dan hman tur pahnih siamthatna pawm a ni.
Taxation minister Lalchamliana ngenna – “The Mizoram Goods and Services Tax (Amendment) Bill 2023” leh Labour Employment Skill Development and Entrepreneurship minister Lalchhamdama Ralte ngenna angin “The Mizoram Shops & Establishment (Regulation of Employment and Conditions of Service) (Amendment) Bill 2023” chu House-ah sawi ho a ni a, pawm zui a ni.
LESDE minister hian Shops & Establishment Bill hi a sawizau a. India rama labour law 44 hmek mek zingah Mizoramah a takin 18 hman ve mek a ni a; chumi zingah chuan The Mizoram Shops & Establishment Act hi a tel tih a sawi. Kum 2010 khan he dan hmasa ber hi House-ah pharh a ni a. He danin a tum ber chu, sumdawnna dawr hrang hranga hnathawktute hamthatna leh an thlavang hauhna tur a ni a. An hnathawh hun chhung, chawlh an lak theih dan tur, maternity benefit, minimum wages, chhan mumal awm loa hnathawktu ban tawp ang chite humhalhna tur lam hawi a ni tih a sawi.
Siamthat rawtna zingah, he dan hmang thei tur chin, sumdawng, mi 5 chhawr chin tih chu mi 10 chhawr chin tia thlak a ni.
Tun tuma dan siamthat rawtna hi sawrkar laipui atanga thu an hmuh anga engemaw lai siamthat hlekna mai niin a sawi bawk.
Dan siamthatna pahnih pawm
