Daily Newspaper

Dan theih loh Everton l leh Calvert-Lewin

15

Nilai zan khan Coarabao Cup third round khelh chhunzawm a ni a. Season thar bul tan tha tak Everton chuan hnehna chang leh in, goal thun thei thar tak Dominic Calvert-Lewin chuan hat-trick a siam leh pek a, Everton leh Carlvert-Lewin dang thei an la awm lo zel. Inkhel dangah team lian pahnih Manchester United leh Manchester City te pawhin hnehna changin fourth round an inhlangkai ve bawk.

Everton an kal zel
Season thara khel tha tak, inelna an hmachhawn zawng zawnga hnehna la chang vek Everton hian Goodison Park-ah London club West Ham an mikhual a, Carlvert-Lewin leh Richarlison te goal thun hmangin 4-1 in hnehna an chang.

Goodison Park-a inkhelah hian Carlo Ancelotti-a team ten bul an tan tha leh pek viau. |an atanga minute 11-na lekah Ancelotti hnuaia par vul thar tak Dominic Calvert-Lewin chuan hmahruaina goal a thun nghal nawlh. Bul tan tha in, goal thun thuai mahse goal dang an thun belh thei lawk lo thung a, si khat faia hmahruai chungin chawlhlawk an hmang.

Chawlhlawk hnu lamah mikhual team Hammers in bul an tan tha ve thung a, tan atanga minute hnihna lekah Robert Snodgrass chuan goal thunin an si phurh a sut. Goal an chhuah a, an ihnehtawk hnuin Everton an har thar a, tha takin an inlan zui. Minute 56-na ah Richarlison chuan hma an hruai let lehna goal a thun a, hemi hnu hian Carlvert-Lewin a inlar zui. Carlvert-Lewin hian minute 78’ leh 84′-ahte goal a thun belh a, a hattrick a siam. Kum 1993 hnu lamah Everton tan League Cup-a hat-trick siam leh thei hmasa ber a ni. Rooney hnu lamah Toffees tan EPL-a hattrick siam thei hmasa ber a ni bawk a, season tharah a chetha vet vet hle. Everton tan a chetthat a, goal a thun theih tak em vang hian England manager Gareth Southgate chuan a vawikhat nan ram aiawh turin a ko ta hial nghe nghe a ni.

Everton hi inelna hrang hrangah vawiruk an chak zawn mek a, Inrinni zana an khingpui Brighton an hneh leh thei a nih chuan Everton FC an din hnu lamah bul an tan that ber hun an tawng ang. Brighton hi Goodison Park-ah an mikhual dawn vangin Everton hian hnehna an chan leh theih ngei a beiawm hle.

United an chak
Beisei anga season thara khel tha lo Manchester United chuan kartawpah sawisel hlawh taka an hneh hram Brighton chu khualmualah an hmachhawn nawn leh a, si thum faia hnehna changin Carabao Cup fourth round an inhlangkai ve bawk.

Beisei anga thaa khelchhuak hleithei lo United hian khualmualah bul an tan tha thei bik lova, goal pawh a lut har hle. Chawlhlawk hmain goal lut a awm thei dawn lo emaw tih hnuin minute 44-naah midfielder Scott Mc-Tominay chuan hma an hruaina goal thun nawlh a, si khat faia hmahruai chungin chawlhlawk an hmang.

Chawlhlawk hnu lamah pawh team hnihte an inawr tawk leh viau a, goal dang a luh belh mai thei lo leh. Hun tawp dawn hnaiah United an che fuh hle a, goal hnih ngawt an thun ta thung. Minute 73-naah Juan Mata chuan an goal hnihna thunin an chakna a nem nghet a. Minute 80-naah Paul Pogba chuan an goal thumna a thun zui ve leh bawk. Brighton laka an goal thun pathumte hi midfielder thun a ni vek teh tlat a, Ole Gunnar Solskjaer-a tlarhma ten inenfiah a, insiamthat thuai an mamawh hle nia ngaih a ni.

United hian EPL-ah khingpui hautak tak an neihzui a ngai dawn a, Pathianni zan khian London club lian Tottenham an hmachhawn dawn. United hian thawhleh zan khan team lian Chelsea an petchhuak a, United manager hlui Jose Mourinho hnuaiah inrintawkna an nei chho leh mek a, United nen an inhmachhawn tur hi a hmuhnawm hle ngeiin a rinawm.

City pawh an chak
Nilai zan vek hian Pathianni zanah Leicester City ngam lova zawr Manchester City chuan khualmualah Burnley an hmachhawn a, si thum faia hnehna changin fourth round an inhlangkai ve bawk a. An trophy kawl mek humhim turin hma lam an pan zel.

Champion lai City hian khualmualah bul an tan mai bik lova, goal pawh an thun mai thei bik lo. Chawlhlawk dawn hnaih minute 35-naah Raheem Sterling chuan hma an hruaiana goal a thun ta nge nge a, si khat a hmahruai zawk chungin chawlhlawk an hmang.

Chawlhlawk hnu lamah erawh bul an tan tha ta viau thung. Minute 49-na lekah Sterling chuan an goal hnihna a thun zui leh a, minute 65-naah Ferran Torres chuan an goal thumna a thun belh zui leh zat a, khualmualah si thum fai ngawta hnehna changin fourth round an inhlangkai ta a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy