Dan tlawhchhan tur…

July ni 1 atanga ‘Mizotaxi’ app hman tur chungchangah thu dang a awm leh a. Sawrkar thuchhuah hmasa zawk ang chuan, June 2026 chhunga in-register te tan registration fee kum khatah Rs 600/-; hemi hnu lama in-register te chu Rs 1000/- an pek a ngai tawh ang, tih a ni.
Thuchhuah tharah chuan, registration fee Rs 500-ah tihhniam a ni a; late fee (Rs 1000) thai bo a ni bawk. Hei hi June ni 8-a Mizoram Taxi Association, Aizawl Two Wheeler Taxi Association, Aizawl District Auto Rickshaw Owners Association hruaitute leh transport minister leh STA secretary te inbiakna rah a ni awm e.
Hetih rual hian, dan lam inti hre deuh te chuan Mizo taxi app hman tur chungchangah dan tlawhchhan tarlan a ni lo chu an lo helh ve hle mai a. Sawrkar hmalakna, sawrkara sum lut tur thil, mipui nghawng chu dan hmanga tih tur a ni a, dan tlawhchhan tur awm si lova tute emaw tha tih dana tih zel mai a nih chuan sawrkar a awm lo tihna tluk a ni thei, an ti a. Mizotaxi app chungchanga dan tlawhchhan tur a awm lo a nih chuan state tan a him lo, an lo ti ve mek bawk a.
Lirthei chungchanga sum, ‘fee’ lak theihna tur hrang hrang 16 chu MV Rules-ah a awm laiin, tuna kan buaipui tak ‘app’ ang chi hi chu MV Rules-ah hian a la awm chiah lo nge ni?
Hetih lai hian, sawrkar chuan taxi hman man ‘taxi fare’ erawh a bituk thin a, a khat mawi tawkin a ennawn (revise) thin a. Tunhmaa stand khata Rs 5 chawina thin pawh tunah chuan Rs 50 vel a ni tawh. Taxi driver-te hian petrol man a sang tiin anmahni thuin taxi fare hi an tisang ve mai bawk a, chu chu sawrkar hian hre reng mah se, ‘taxi fare anga tlan tur’ tih thuchhuah siam khum bak hmalakna a nei em em ngai lo.
Tuna taxi driver tam zawkin taxi fare an lak hi sawrkar rate a ni lo a, sawrkar rate anga tlan hi an awm lo hial zawk awm e.
Chumi awmzia chu, taxi driver-te hian taxi fare lak chungchangah sawrkar dan an bawhchhia a, dan bawhchhiate hrem theihna dan pawh a Awm ngei ang.
Tuna taxi app ang chi hman dawna taxi khalhtute atanga pawisa lak theihna dan hi a la awm chiah lo a nih chuan, sawrkar lam hian pawisa hi la rih lo mai se, taxi fare chungchangah hian khauh takin dan kengkawh phawt mai se; taxi app hman theihna dan te chu assembly thutkhawm leh hunah legislate leh mai se, chu chu a fel mai awm asin.