Dancer hriat hlawh Hriata kan thlah liam ta
Mizo lamthiam zinga hriathlawh leh hlawhtling ber pawl, Nintendo ti a hriatlar, Lalhriatzela, kum 25, chu nimin khan Zuangtui-ah vuiliam a ni ta. Hriata hi July ni 6 chawhma lam dar 10 velah khan an huan a tihfaina lamah electric current-in manin, a boral zui ta a ni.
Hriata hi Mizo lamthiam zingah chuan tawnhriat ngah leh thleng thui ber zinga mi a ni a, 2016 khan Mumbai a Hip Hop International, Indian National Qualifiers ah 2 VS 2 All Styles Battle ah Arunachal a ?hianpa nen Gold Medal an lo la tawh a. Tin, 2019 khan Indian dance reality show lar Star Plus Channel buatsaih ‘Dance Plus’ ah Top 32 a lo thleng tawh bawk a. Mizo zinga dance reality show leh competition a thleng sang ber a ni. Zonet buatsaih U Got Talent 2017-ah Snow Buzzer a lo dawng a, heng bakah hian State leh Regional level intihsiakah lawmman hrang hrang a dawng tawh bawk a ni.
Delhi leh Mumbai-ah te training lain, 2020 khan Singapore-ah India aiawhin intihsiakna lianah kal turin a inbuatsaih, mahse, Covid hripui leng avangin a ?hulh ta a ni. Mizo Dance Camp Team member angin kumin January thla khan Power of Desi Street Mumbai-ah Mizoram aiawhin intihsiakah a tel leh a. April thla khan Battle Yaa Skills, Bangalore-ah a tel zui bawk a ni. Hei hi lam thila a zin chhuahna hnuhnung ber a ni ta a ni.
Hmanni lawka buatsaih Mizo Dance Camp ‘The Main Event’ Mizoram Dance Sports & Movement Championship-ah khan Organising Member a ni a, showcase-ah a dance piece ‘Rest In Motion’ tih chu a lam hnuhnungber a ni ta. Alan Rinawma, MDC Founder & Creative Director chuan chuan Hriata a ui thu sawiin, ‘Mizo lam mi tan chuan channa nasa tak a ni, amaherawhchu, a sulhnu hi Mizo dance community chuan a hre reng tawh dawn a ni,” a ti.
Dancer hriat hlawh Hriata kan thlah liam ta
