Daily Newspaper

Darkar 24 chhunga penalty kick tam record a siam


North Wales-a emergency medical technician pakhat chuan ball pet-ah Guinness World Record a siam a, a record siam chu darkar 24 chhung a penalty pet hnem ber record a ni.

A hming chu Stephen Ford a ni a, kum 32 a upa niin, Liverpool FC fan a ni. Tichuan le, Inrinni kalta khan Llandudno FC Maesdu Park stadium-ah record siam tumin penalty a pet tan ta a, darkar 24 chhung penalty a pet tlauh tlauh a, vawi 2,075 a pet hman a, Guinness World Record a siam ta a ni.

A hmaa hetiang record siamtu chu Jammu & Kashmir a cheng, Vickrant Mahajan niin, 2016 khan record siamin darkar 24 chhungin penalty vawi 1,111 a pet hman a, he record hi Stephen hian a rawn khum chiang hle a ni.

Stephen hian darkar 8 chhungin record thar a siam hman a, mahse, chawl duh chuang lovin darkar 24 chhung a pet zui a, vawi 2,075 a pet ta a ni. He record hi chu khum a har deuh talh tawhin a rinawm.

Stephen chuan, “Llandudno Football Club leh ka thiante leh naupang ho, ball boy a tang te tel lo chuan he record hi ka siam thei bik kher lo ang,” a ti a. A record siam lai hian a hmunah Guinness aiawhin record a pawm theih a ni em tih an en pui reng bawk a ni.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy