Nagpur a cheng, mipakhat, kum 38 mi chu August ni 25 khan heart attack avangin damdawi in panpui a ni a, darkar khat chuang a lungphu a awm tawh loh hnuah doctor ten an nem nung leh tlat. He damlo hi ni 45 chhung ICU-a a awm hnuah October ni 13 khan dam takin damdawi in a chhuahsan leh ta niin Times of India chuan nimin khan an tarlang.
American Heart Association chuan cardiopulmonary resuscitation (CPR- in nem nun kan tih mai hi) hi minute 40 tih hnuah return of spontaneous circulation (ROSC) emaw heartbeat (lungphu) a awm leh a nih loh chuan tawpsan tawh tur an ti a. Mahse, he case-ah hi chuan cardiologist Dr Rishi Lohiya chuan minute 40 pel rakin CPR hi a pe a, minute 45 hnuah a lungphu a awm leh ta a ni.
Dr Rishi hian damlo chu a kum zat leh ventricular fibrillation monitor-a a lang avang chuan minute 40-ah CPR chu tawpsan mai lovin, CPR leh defibrillation shock an pek chhunzawm zel a, damdawi in record-a a lan dan chuan minute 45 CPR an tih hnuah a lungphu a rawn awm leh ta a ni.
Dr Lohiya chuan CPR an tih hmasakah chuan minute 20 chuang an tih hnuah ROSC second 30 vel a awm a, mahse, hei hi rikrum thil a nih tawh avangin an chhinchhiah hman tawh lo niin a sawi a, “Ventricular fibrillation a awm chuan defibrillation shock leh cardiac massage te hman a ni a, hei hian lung a tiphu leh thei a ni,” a ti.
CPR tihnaah hian in nem nasat lutukna lamah ruh tliak leh auh te pawh a awm thei a ni a, shock pek deuh fo an nih avangin vun kâng te pawh a awm thei, mahse, he damlo hi chuan hetiang harsatna hi engmah a tawk lo niin Dr Lohiya chuan a sawi a, “Damlo hi CPR tha taka pek a nih avangin a side effect awm thei engmah a nei lo a ni,” a ti bawk.
He damlo hi IT company a thawk niin, ni 3-4 vel chu a taksa nuamsam lo a insawisel a, tichuan August ni 25 chawhma lamah KIMS-Kingsway Hospital a pan a, mahse, damdawi in a thlen hmain nikhaw-hre-loin vawi hnih a awm hman a ni. Ni 40 chhung ventilator vuah a ni a, ICU-ah ni 45 enkawl a ni a, tunah chuan dam takin damdawi in a chhuahsan leh tawh a ni.
Darkar khat chuang a lungphu a awm tawh loh hnuah a dam chhuak
