Darzo-a hydel project siam tumnaah centre-in Mizoram sawrkar a rawn lo – Congress Thalai president

Darzo-a hydel project siam tumnaah
centre-in Mizoram sawrkar a rawn lo
– Congress Thalai president
Darzo-a power megawatt 2400 siamchhuahna tur hydel project ruahman mekah India sawrkar chuan Mizoram sawrkar rawn loin contractor thlengin a thlang fel tawh a, Forest Conservation Amendment Act kan lo pawm ve pawi zia a lang tan mek tih Congress Thalai hruaitu Laltawnliana chuan a sawi.
Inrinnia Congress Thalai Hqrs. in Krismas Urlawkna hun an hmanah Congress Thalai president hian, chief minister Pu Lalduhoma’n Darzo-ah power megawatt 2400 siamchhuahna tur an din tur thu a sawi chu thil lawmawm tak angin lang mah se, he power project buatsaihnaah hian central-a BJP sawrkarin Mizoram sawrkar a rawn miah lo niin a sawi.
“Power chungchang hi central leh state thuneihna intawmna – Concurrent list a ni a. Tuna megawatt 2400 siamchhuahna turah hian BJP sawrkar chuan contractor thlengin a tifel vek tawh. BJP sawrkarin kan state-ah project lian a lo ruahman hian a ram neitu kan state sawrkar a rawn ve miah lo hi ZPM sawrkarin BJP a tlawn avanga Mizorama an duh duh dana hma an lak phalna turin FCAA kan adopt avanga min palzut bul tanna a ni a, chief minister-in defence leh thil pawimawh bikah lo chuan central hian engmah anmahni thuin tih theih an nei lo, tia a sawi kha kan state chhungah defence thil ni loah pawh an duh duh an tih dawn chian zia a nemnghet,” a ti.
Congress Thalai president chuan kum 2025 chhungin mipui nghawng, mipui harsatna chungchangah tum tam tak hma an la a. Mizoram mipuiin a hlawhtlinna an hmu a, Congress Thalai hmalakna avanga lawmthu hrilhtu pawh tam tak an awm tih a sawi a. Heng hi an zavaia tanrualna a ni, tiin, an hlenchhuah theih chhan chu Pathianin hun tha a pek vang leh an ruahmanna a tihhlawhtlinsak vang a ni tih a sawi a ni.