Khawi restaurant-ah emaw zanriah ei pui-ah i sawm a, chu chu invawi khat chhuah dunna pawh a ni mai thei. Zanriah a nih kher loh pawhin chawchhun te pawh a ni thei tho ang. Chutiang hunah chuan chawei dawhkana chetdan phung pangngai mai piah lamah amah i ngeihven dan te a lantir thei a, chuvangin chet dan uluk hle a ngai a ni.
A hmasa berah ei tur order ringawt chu thil pawimawh ber a ni lo tih hria la. Menu bih ngur reng ringawt lovin i date chu uluk takin thlithlai zawk ang che.
Nangmah duhzawng ni lovin, a duh zawng order tum la, a duhzawng i hriat sak theih chuan mark i hmu sang nghal dawn a nia!
Eitur a rawn thleng a, i ril chu eng anga tam tawh pawh nise hap nghal buan buan suh. I date chu ngaichang la, ei zawhsan thuai suh, a thil ei lai i lo en reng a ngai ang a, a fuh lovang. Muang fan deuh raihin ei la, thil ei paha ti ti nuam tawk velin. I kaa eitur i hnawh luh inkarah a tlemberah second 10 vel tal tla hman rawh se.
Thil tuiril lam chi chu hawp ri hruih loh turin fimkhur la, thil ei zawha hmui liah kual emaw, ka ang deuh phuau chunga thil thial tulh tulh ang chite tih loh tawp tur a ni. In in-date vawikhatna kha a tawpna a ni palh hlauh ang e. Tih loh tawp atana tha leh chu, chaw thial tulh tulh chunga tawng zuah zuah.
Hmeichhia ten an purse te chu dawhkana dah mai an ching a, mahse, a nalh lem lo. In dawhkan kilah thutthleng ruak a awm chuan, chutah chuan dah zawk tur a ni. Napkin pawh i mal chungah i phah ang, bib ang maia awrh tur a ni lo a nia.
Thil ei pahin i date chu melh zauh zauh la (thlir vung vung chi erawh a ni lo, thil a ei tha ngam lovang), a khat tawka nuih deuh sak sak tur a ni. A thil ei a tui em, tih te pawh thil ei karlakah zawh zauh zauh tur.
Eng emaw tul bik thilah lo chuan thil ei laiin dawhkan thawh san suh. I date chuan i tan a pawimawh tawk lo emaw a lo inti palh ang e.
Date dining etiquette
