Site icon The Aizawl Post

David Crosby a thi

Rock and Roll Hall of Fame-a tum hnih lak luh tawh, The Byrds member thin, Crosby, Still & Nash leh Crosby, Still, Nash & Young dintu, folk-rock khawvela kum 60 chuang lo tal tawh David Crosby, kum 81, chuan mual a liam ta. A thih chhan erawh he thu buatsaih lai hi chuan puan a la ni lo.

Los Angeles chhuak Crosby hi Oscar pawh dawng tawh cinematographer Floyd Crosby fapa a ni a, 1964-ah The Byrds a zawm a, 1965-ah an band hian Billboard Hot 100 (singles) chart-a No.1 kai thei hla pahnih ‘Mr. Tambourine Man’ (Bob Dylan phuah) leh ‘Turn!Turn!Turn! (To Everything There Is a Season)’ Pete Seeger phuah te an tichhuak ngha.

Mahse, a bandmatr Roger McGuinn leh Chris Hillman te nen an inkarah neuh neuh a awm tak avangin Crosby chuan 1967-ah Byrds a chhuahsan a, 1968-ah Stills leh Nash te nen intawngin, trio ‘Crosby, Stills & Nash’ (CSN) an din a, 1969-a Woodstock pawh an inlan. A self-titles debut album-ah Hot 100 top 40 a lang thei hla pahnih ‘Suite: Judy Blue Eyes’ (No.21) leh ‘Marrakesh Express” (No.28) an nei nghal a, 1969-ah Grammy best new artist an dawng nghal. Crosby hian Grammy record siamin, 1965-ah The Byrds angin Grammy best new artist-ah nominate a lo ni tawh bawk a, ani chiah hi Grammy best new artist category-a tum hnih nominate awm chhun a la ni.

Crosby hian Grammy nomination 10 neiin, ‘Remember My Name’ avangin best music film category-ah nominate a ni tawh bawk a, mahsem CSN anga best new artist an dawn hi a Grammy dawn awm chhun a ni ta a ni.

1969-ah Crosby, Stills & Nash chu Neil Young-a’n a zawm a, ‘Crosby, Stills, Nash & Young’ (CSNY) an inti ta a, vanglai an tawng tan ta a ni. 1970-a an album ‘Deja Vu’ chu chart No.1 a kai a ni. Hemi kumah hian Young nen an inhmuthiam lo a, Young hian band a chhuahsan zui a, CSN pawh an thawm a reh zui ta deuh a, 1977-ah album an tichhuak leh thei chauh a, an self-titled album tichhuakin, he album a hla ‘Just A Song Before I Go’ chu an larpui khawp mai.

1982-ah ‘Daylight Again’ an tlangzarh a, he album a hla ‘Wasted On the Way’ leh ‘Southern Cross’ te pawh an lar pui viau. Tour te neia an kual zak zak hnuah 2016 khan band an kehdarh ve ta a ni.

Solo lamah pawh hnuhma a nei nual a, a solo album hmasa ber ‘If I Could Only Remember My Name’ chu 1971-ah a tlangzarh a, Nash nen
‘Crosby & Nash’ angin studio leh live album an tichhuak nual a, 1996 leh 2004 inkarah Crosby, Pevar & Raymond angin record an tichhuak nual bawk. 2014-ah a solo album ‘Croz’ a tichhuak leh a, chumi hnuah Snarky Puppy member Michael League nen thawk dunin album panga an tichhuak leh a, nikum December khan 2018-a an lo record tawh David Crosby & The Loghthouse Band: Live at the Capitol Theatre an tichhuak a, hei hi a live solo CD/DCD set hmasa ber a ni ta a ni.

Crosby hi ruihhloin a tibuai ve hle thin a, 1985-ah drug a kawl avangin jail te a tang hial a, 1994-ah a thin thlak (liver transplant) a ni am 2004-ah drug leh ralthuam kawl avangin jail bang a zut ve leh zuai bawk.

Crosby hian a hun tawp a hnai tih inhriain, nikum khan Consequence-in an kawmnaah, “Eng chen nge hun ka la neih dawn ka hree lo. Kar hnih lek a ni thei a, kum 10 lai pawh a la ni thei tho. Ka hun tawp lam ka hnaih tawh tih chu ka chiang. Eng tianga rei nge hun ka la neih tih lam a pawimawh ber lo va, ka hun neih chhunah chuan eng nge ka tih tih hi a pawimawh zawk chu a ni lawm ni? Ka tih ve theih awm chhun ni a lang chu rimawi hi a ni mai a, ka thiam zawng tak a ni ve a. Ka hun la neih chhun chu thiam belh lehzual nan hman tum ila. Rimawi tam thei ang ber tihchhuah nen. Chu chu ka tih tur chu a ni mai,” a ti.

Crosby hian a nupui, Jan a fapa pahnih Django leh James Raymond te a kalsan a ni.

Exit mobile version