Daily Newspaper

Dawhthei takin kum hnih vel kan nghak tawh – MNF

13

MNF MLA-ten MLA atanga ban tura an nawr mek Pu Lalduhoma chu a dan bawhchhiat hi kum hnih deuhthawh dawhthei takin an lo thlir tawh, bantir a nih mai hlauhpui avanga thurawn pek thin pawisa loin a aia nasaa in a tal zel niin MNF party chuan an sawi.

MNF Gen. Hqrs. thuchhuak chuan, Pu Lalduhoma hi Congress president hial ni tawh, kum 1984-a chuhtu awm loa Congress ticket-a MP-a thlantlin a ni, tiin, hemi hnu hian Congress chhuahsanin pawl hrang hrang – Congress for Peace leh a dangte a din thu te; Congress MP ni chung siin a party din MNU ticket-in MLA a chuhsan thu te; Congress party hian hun rei tak chhung dawhthei taka an en hram hram thu leh, a tawpah chuan an tan tihngaihna a awm tak loh avangin, a thlangtute leh ram mipui pawh zahloa amah tela dan siam, Anti-Defection Law a bawhchhiat avangin, khatih laia Lok Sabha Speaker Balram Jakar hnenah Congress MP-ten an hek thute a tarlang.

Lok Sabha Speaker hian Pu Lalduhoma hi Anti-Defection Law a bawhchhia tiin, kum 1988 khan MP a nihna atanga a ban tak thu leh, India ram history-ah he dan bawhchhiat avanga MP ban hmasak ber a nih thu te a tarlang bawk.

‘Chutiang bawk chuan tunah Pu Lalduhoma hi MLA-ah independent ticket-a thlantlin a ni a. Tunah phei chuan Anti-Defection Law-a ‘hmun thuma thena hmun khatte remtihnain pawl sawn theih’ tih dan awm thin kha paih a ni tawh a. Chuti chung chuan independent ticket-a thlantlinin ZPM party a zawm tak thu mipui hmaah a puang a. Mi thenkhatin ‘heti chuan dan bawhchhiat avangin an disqualify mai ang’ tia thurawn an pek thin pawh a pawisa duh lo a. Cho lui leh elsen zawk ang hrimin, a aia nasa lehzualin a tal chhunzawm zel a. MNF pawhin dawhthei takin kum hnih deuhthaw kan lo thlir tawh a ni,’ a ti.

Congress-in an hun laia tihngaihna dang a awm tawh ngang loh hnua Lok Sabha Speaker hnenah an hek ang khan, tunah hian MNF MLA-te pawhin Assembly Speaker hnenah an thlen ve ta tih MNF thuchhuah hian sawiin, ‘Congress hunlaia an lo paih tawhna dan tho kha a bawhchhiat zel avangin, tunah hian Speaker hnenah a chungthu rel tura thlen a ni,’ a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy