Lallunghnema
Charity Lodge
Cont: 9862288182
Mizo Consumer-te harsatna lian tak pakhat chu Dawrkai leh Sumdawngte hlauhna thlarau hi a ni a. Dawrkai leh Sumdawng lian apiangah hlauhna hi a hluar niin a lang bawk. Chawhmeh chi hrang hrang, thei ei chawp zuartute hi an dinhmun a hniam deuh vang nge ka hre law, consumer-te hian kan zuam mah mah châng a awm fo thin. Hei hi a tha lo a ni. An thil zawrh lai ‘dawn’ hniam fo te pawh hi a puitlin loh thlâk hle a ni. Thlai leh buhbal zuartute pawh hian bumna thinlung an pu bîk lo turah ngai ila.Thil fûn kâra, a chhia telh rûk ching pawl an awm thin. Hetiang sual thil tih hi a kristian zia lo hle a ni.
Ka tawn hriat pakhat chauh ka han hrilh ang che u.
Tûk khat chu bazarah phuihnam têl khat hi ka lei ve a. In lama ka haw hnuah ka han phelh a, a kuang eng emaw zat hi an lo phûm ru a nih chu! A thinrim thlâk ngei mai!
Khawvela natna tihbaiawm ber zinga mi chu cancer natna hi a ni a. Tihdam a har êm êm a ni. Sumdawngte hlauhna hi a nghet hle. Ram changkáng lovah a hluar hle. Ram hmasawn zawkah chuan Sumdawngte hlauhna a tlêm hlein a rinawm.
“Keini chu kan changkâng lova, dawrkai leh sumdawng kan hlau a ni.”
Dawrkai leh sumdawngte laka zâmna leh tîmna thinlung hian nasa takin consumer-te rilruah kua a hreuh tawh a. Hei vang hian consumer sang tam takin an dikna leh an chanvo- te chu an au chhuahpui ngam thin lo a ni.
Kan va sawi zing ta em! He thu hi- Consumer-te tuarna nasa tak chu hriatpuiin India sawrkar ropui tak leh thil ti thei tak chuan kum 1986 December 24 khan the Consumer Protection Act 1986 chu a lo siam chhuak a. A kum leh 1987 atangin he Act hi hman a ni. Consumer tam tak tan thawvenna a lo thleng a ni. Kum 30 chuang fe a ral hnuah Sawrkar Laipui chuan he Act hi titawpin, The Consumer Protection Act 2019 chu a lo duang chhuak leh ta a; he Act hi 2020 kumah hman a lo ni leh ta a. He Danpui hi a lo phuisui zawkin Dan tha tak, mipui vantlang ban phak leh zual a lo ni ta mek a. Consumer sang tam takin an hmang tangkai mek a ni.
He Act-ah hian Chapter VIII (eight) awmin section 107 zet a awm a. Consumer Act thar hian huam zau zawkin thil tam tak he Act-ah hian telh belh a ni ta a. Bungraw chhe hralh leh lei chhiat thuah pawh a siam chhuaktu, manufacturer – te chuan mawh an lo phur ve thei tawh a, chu chu Product Liability tih a ni a. Hei pawh hi a tul dana zirin kan la sawi ang.
Thuneitu sang tak Central Consumer Protection Authority pawh a lo piang a, On-line te, on-line hmanga consumer complaint thehluh theihna Dan te pawh a lo awm ta zel a ni. Consumer Protection Act that bîkna chu complaint eng pawh, laboratory khawla test a ngaih loh chuan ni 90 chhunga chinfel tur tih hi a ni a. Khawi hmun atang pawhin complaint theh luh (file)theih a ni. Consumer Commission a thubuai complaint hlut zawng cheng nuai} l) hnuai lam chin chu a thlawna complaint theih a nihna te leh kut ziak pawh a complaint thlen theih a nih hian a thatzia a hril a ni.
Consumer-te hi chhan ngai tak kan ni a. Mi a zawnga tuar chhel pawl tak pawh kan ni âwm e. Phun liam mai mai, lungawi lo chunga lungawi chîng kan ni a. Chuvangin thil zuartute tan hian thil zawrh a nuam a, sumdawngte tan thil hralh a nuam thin hle a ni. Dawizep mi chuan chân pawh ni se, lungawi a tum zel a. Fing fel nihnaah a ngai fo. Mahse, hetianga mi chapo leh duham te laka lungawi lohna sawi chhuak ngam lo te hi khawiah mah mi hlawhtling an ni ngai lo. Mizo consumer-te hi kan zuamawm hle a ni ber. Zoram Kristian rama thleng atan chuan a zahthlak hle a ni.
Ka consumer zin kawnga ka hmuh nin êm êm chu dawrkai chapo, dawrkai duhâm, dawrkai mahni hmasial, dawrkai hawihhawm lo, dawrkai pawisak nei lo ho hi an ni. Dawrkai leh sumdawng zingah mi tha an awm teuh tih erawh kan hriain kan hmu nitin tho. Anni ho zarah hian dawrkai sual ho an la him zel zawng a nih hi.
Thil leitute zingah thil zuartu sualho han ep tur hi khawvar lam arsi ang chauh an nih thin avang hian consumer-te tuarna hi ni tin, darkar tin a thleng zel chu a ni a. He thil thleng hian tawp-in- tai a neih loh hmel hle si a ni. Consumer-te tuarna a lo tawp theih nana tha thawh thei ber chu consumer-te bawk hi kan ni. Chu chu consumer-te tanrualna vanga lo awm thei a ni. Hetiang hian consumer-te chu an tangrual thei ang:
1) MRP aia sangin tuma’n thil lei loh tur.
2) Bûk tling lo tuma’n lei loh tur.
3) Expiry Date pel tawh tuman lei loh tur.
4) Cash Memo lak theuh tur.
5) Bungraw chhia tuman lei loh tur.
6) Thil lei hmain belh chian tur.
7) Thil lei hmain a zuartute nen chiang taka inbiak thin tur.
8) Bungraw lei a chhiat chuan report nghal vat tur.
Heta ka sawi loh pawh kan hriat ngei ngei tur a awm nual ang. Consumer daw thei, rinawm lo eng emaw zat kan awm thin. Thil zuartu leh hralhtute ngawr ngawr kan dem thei lovang; a dawrtu, leitute pawh hian kan zir ve a ngai em em a ni.
Dawrkai leh sumdawng chuan a hralh loh chuan a hlawhchham a; leitu chu lei loh pawhin a khawsa thei tho a ni. Chuvangin hei hi hre rawh:- ‘Dawrkai chu Dawrtute tel lo chuan a thi’ a ni tih hi.
Kan sawi zel ang. Consumer Protection Act 2019 kan hman mek, sec 2(9) ah hian Consumer Right 6 tarlan a ni a. Chung Consumer Right 6 zingah chuan Right to be informed hi a pawimawh hle a.
Thil zuartute chuan an ngai pawimawh hle tur a ni ringawt. Sawrkar hian consumer-te hlimna leh lawmna, lungawina hi a dah pawimawh hle a ni. Chuvangin Consumer Right 6 lai min duan chhuahsak a ni.
Sap tawnga a inziak dan hian ka han pho chhuak leh lawk ang e. The Consumer Protection Act 2019 Sec 2(9) includes — “the right to be informed about the quality, quantity, potency, purity, standard and price of goods, products or services, as the case may be, so as to protect the consumer against unfair trade practices.”
Han sawi zau hran pawh a ngai âwm love. Bungraw tha lo lei laka consumer-te an him theih nan thil zawrh lai dinhmun chu a lo hrilhfiah thin tur a ni. Customer te tana inhawng tak leh hawihhawm takin a thil zawrh lai chu a lo puang zar thin tur a ni. Hei hi Dawrkai te bat a ni a. Consumer-te dikna leh chanvo an neih ngei ngei tur a ni. Dawrkai thenkhat chuan an in lengte an lo tum khum bur thin a. Lal emaw zu inti hial thin a! A pawi thin khawp mai.
Nang erawh chuan fimkhur takin thil zuar la, fimkhur tak bawkin i mamawh chauh lei thin ang che. Hei hi thurawn rangkachak chu a ni.
I thil leiah harsatna i neih chuan kan pui thei reng a che. Consumer tel lo chuan thil zuartu leh service petute hian nunna an nei lo tih erawh hre reng ang che.
Ni tha i tan!