Congress party chu BJP beih nan dawt politics hmang tawh lo turin an chah tih BJP Mizoram chuan an sawi.
BJP Mizoram State thuchhuak chuan, tunhnaiah MPCC treasurer Dr Lalmalsawma Nghaka chuan an party mite intuaitharnaah central BJP-in India pawisa note-ah Hindu pathian Ram thlalak chuantir tum angin a sawi tih sawi chhawngin, ‘State khat party lian ve tak hruaitu in a sawiah chuan a awm ang lo kan tiin, dawt hmanga mipui zirtirna pek fo hi bansan hram tawh turin kan ngen a, thudik hmanga politics khel ve mai turin kan ngen a ni,’ a ti.
Mizoramah hmasawnna tak tak, mirethei thleng phak development thlentir chu BHP duh ber a ni, tiin, Mizoram mipuiin intodelhna kawng kan zawh theih reng si, zawh hleithei loa kan tang rei ta lutuk chu beidawn thlak an tih thu a sawi a. Chumia mawhphurtu pakhat Congress party-in dawt politics hmanga Mizoram mipui an bum fo chu sim thuai tur leh tunhnuah chuan ti tawh lo turin an ngen tih a sawi bawk.
‘Dawt hmanga BJP bei a, social media emaw thusawinaa thehdarhte chu dan anga hma lak zel kan tum tawh a. Thudik lo leh thuchiang lo hmanga mipui tichiai thei leh dawt hmanga BJP beihna rawngkai sawi tawh lo turin kan inngen a ni,’ BJP Mizoram hian a ti.
Dawt politics hmang lo turin BJP-in Congress chah
