|hal bawr hliam avanga Pathianni Premier League home game-a Arsenal hmachhawn ve thei ta lo Manchester City midfielder Kevin De Bruyne kha a tha chak hle a, manager Pep Guardiola chuan a chhawr leh theih tep tawh thu a sawi.
Kum 33-a upa ni ve tawh Belgian hi karliamta Nilaini Champions League match pakhata Inter Milan nen goal awm loa an inhnehtawk tum khan a inhliam a, nizan League Cup third round inkhel result tarlan hman tak loha City-in Championship (second-tier) club Watford an mikhual tum ha chuan la inlan hman lo tura ngaih niin, kha game denchhena news conference a hmachhawn tumin Spanish coach hian engtia rei nge a midfielder tawnhriat ngah tawh chu a la nghah dawn tih sawi thei chiah lo mah se a kir har tawh lo tura a ngaih thu a sawi.
Kartawpa English Premier League-a Newcastle United an luhkhung huna khelmual a luh hman dawn leh dawn loh pawh a la sawi theih loh thu Guardiola hian sawiin, “Tun dinhmunah chuan a ke hi a duh angin a la hmang thei lo a, nuam lo a la awm a, rei a chawlh erawh a ngai tawh lo turah ka ngai,” a ti.
Tarlan tak angin, season liamta khan chawn tha na avangin De Bruyne hi thla li ngawt a lo chawl tawh a; kumin January thla khan St James’ Park-ah comeback hlawhtling zet neiin mualneitu Newcastle lakah goal khat thunin a team chu 3-2 hnehna a chanpui a, tunah hliam bawkin a tlakbuak zui leh ta a ni.
Pathianni zan Arsenal game-ah khan goal thun hmasa zet chungin hun chanve chuang zet player pakhata kim lo chunga khel Gunners hneh zo loin, an kawtkaiah 2-2 draw hlawhchhuak ringawt bawk mah se season kal lai game nga an khelh tawh atanga point 13 hum chungin Etihad club hian league table-ah hma an la hruai.
De Bruyne kir hnai
