De Jong leh Pedri la thochhuak mai dawn lo
Barcelona chuan tunhnai maiah an player pawimawh pahnih inhliam an la chhawr thei dawn lo niin a lang a, karleh Thawhlehni Champions League game pawimawha Napoli an mikhual hunah Frenkie de Jong leh Pedri an dam hman dawn lo a, La Liga lama Atletico Madrid an luhkhung turah pawh an la inpeih hman dawn loh avangin Barca midfield-in ngai a la awh pha dawn lo niin a ngaih theih!
Pathianni La Liga match-a Athletic Club nen goal awm loa Barca inhnehtawk tum khan De Jong chuan a kheimit a tina a, a lo berah pawh thlakhat tal a chawlh rin a nih avangin April thla hma hi chuan khelmuala a kir hman a rinawm loh.
San Mames khelmuala malpui hliam avanga khel zo thei bik lo Pedri hliam pawh tunkar Thawhtanni khan endik niin, ani pawh hi March thla chhunga inelna hmachhawn hman lo tura ngaih ngheh a ni.
De Jong leh Pedri bawksawp hma hian Barcelona player pawimawh dang Gavi pawh hliam avangin a lo chawl tawh a, Barca midfield-in harsatna lian tak a tawh chhoh mek avangin Champions League round of 16 first leg-a 1-1-a an draw tawh Napoli an mikhual hunah hian an talbuai thei mai ang em tih chu Nou Camp club tantute hlauhthawn ruk a ni!
Tarlan tak angin, team pahnih hi thla hmasa first leg-ah khan Stadio Diego Maradona-ah sikhat ve ve thunin an inhnehtawk tawh a, March ni 12 khian Blaugrana hian Olympic Stadium-ah Italian champion hi second leg khelin an mikhual ve thung dawn a ni.
Xavi Hernandez-a team hian Europe bakah tualchhung league lamah pawh game pawimawh tak tak khelh tur an nei indawt chho zut a, La Liga table-a pathumna ni chunga title beiseina an la neih ve chhawmnung turin chak an mamawhna a sang hle a; kartawp Zirtawpni zan hian league-ah Mallorca an mikhual dawn a, March ni 17-ah Atletico luhkhungin international break hma ngei hian hmah ruaitu Real Madrid nena point riat ngawta an inthlauh mekna pawhzim an tum dawn a ni.
Barca hian Napoli hneha round sang zawk an lut thei a nih chuan April thla tir lam hian Champions League quarter-final an khelh hmel a, April ni 21 khian season kal laia La Liga Clasico vawihnihna khel turin Bernabeu an lut bawk ang.
Hliam lamah kirleh ta ila, tun hi season kal laia De Jong-a’n a kheimit a tihnat vawihnihna ni tawhin, nikum September leh November thla chhung khan tuna a hliam avang bawk hian thla hnih dawn a lo chawl tawh a ni.
Pedri ve thung pawh hi hliamin a tibuai ve fo a, kum 2020-21 chhung khan Barca tana a debut campaign-ah game 52 khel tling mah se a hnu lamah a talbuai ta fo a; kha mi kum khan Spain tan European Championship leh Olympic Games a khel bawk.
Las Palmas midfielder hlui hi kum 2021-22 season-ah chuan club leh ram tan hliam avangin game 41 a hloh a, thla tam tak a chawlh chhan kha a kaihza tha na vang a ni.
Se ason liamta second half-ah khan Europa League lama Manchester United nen an inkhelh tumin a kaihza na bawk a chhuak leh a, match 15 chhung zet a chawl leh.
Tun season tir lamah pawh hliam dang avangin thla hnih leh a chanve chhung ngawt inkhel thei lo zawngin a khawsa tawh bawk a, kumin chhung ngei pawh hian tihrawl na avangin chawlhkar thum a lo chawl tawh bawk.
Gavi phei chu khup na avangin tun season-ah a kir hman tawh dawn lo a, midfield lama harsatna lian tak a tawh mek avangin boss Xavi chuan a player la naupang deuh pahnih Marc Casado leh Pau Prim-te chu Thawhtanni khan first team ruala training zawm turin a kochhuak ta hial a ni.
Tun dinhmunah Barca squad-a central midfielder chhawr theih dam awmchhunte chu – Oriol Romeu, Sergi Roberto, Ilkay Gundogan leh Fermin Lopez-te chiah an ni a; hei vang hian tunhnai chhoah khan centre-back Andreas Christensen chu khelmual laihawl lam han hawl thuak thuak tura chhawr a ni fo reng a ni.
De Jong leh Pedri la thochhuak mai dawn lo
