Delhi-a rel station-a innek buainaah mi 18 thi

Delhi-a rel station-a innek buainaah mi 18 thi
New Delhi Railway Station-ah innek buaina thlengah mi 18 vel an thi a, mi dang 10 velin hliam an tuar bawk.
Inrinni zan khan rel eng emaw zat tihkhawtlai tawha chuan tumin mi sang tal chu an innek buai a ni.
Thi zinga pali hi naupang an ni a, hmeichhia 10 an tel bawk niin thuneituten an hriat chin an tar lang.
Indian Prime Minister Narendra Modi chuan ‘chhiatna thlenga thi chhungte a tawrhpui tak zet’ tih X-ah a tar lang.
India-ah hian sakhaw thila punkhawm te, kût leh vantlang hmunah innek buaina ang chi hi a lo thleng fo tawh thin.
Inrinni zan chhiatna thlen hma lawk pawh hian hmar lama chawlhkar ruk awh tur Hindu sakhaw hunpui hman mek, Kumbh Mela-a an ni pawimawh bika khaw var dawna an lui thianghlima inbual tum inhawr khawm innek buainaah mi 30 an lo thi tawh bawk.
Delhi-a thil thleng hi a hmutute chuan an state thenawm, Uttar Pradesh-a Prayagraj khawpuia Kumbh Mela hman meka kal tum leh haw lam ‘mi thahnam tak’ an inhawng khawm tih an sawi a. Hmun dang pan tum mi tam tak dangin rel an nghak ve mek bawk tih an sawi.
Thuneitute chuan vanduaina a thlen lai hian rel pahnih chu tihkhawtlai a ni a, rel dang pakhat, Prayagraj pan tur chu chhuah tumin a inbuatsaih mek tih an sawi bawk.
Ruby Devi chu Indian khawpuia rel station lian bera rel nghaktu zingah a tel a, relah hian a chuang thei lo.
Umesh Giri chuan chhiatna thlengah hian a nupui, Shilam Devi a chân a, Prayagraj Express-a chuan tum an ni a, mihring tam lutuk chu ‘thunun ngaihna awm lo’ niin a sawi.
Prayagraj pan tum, Dharmendra Singh-a chuan ‘he rel station-ah hian khatiang reng renga tam kha mi ka la hmu ngai lo’ tiin PTI news agency hnenah a sawi a. “Ka hmaah mai hian hmeichhe paruk pasarih vel chu hlanga zawn sawn an ni,” a ti.
Police (Railways) Deputy Commissioner KPS Malhotra chuan innek buaina thlen dan hi thuneituten an chhui zui mek tih a sawi.
“Rel pahnih lo thleng tur tihkhawtlai avangin he thil hi a thleng a ni ber a, kha rel nghak kha station-ah an phusa ta luai luai a ni,” a ti.
Eptu party hruaitute chuan sorkar sawiselna remchangah hmangin thuneituten pungkhawm an thunun zo lo niin an sawi.
Parliament-a eptu hotu, Rahul Gandhi chuan, “Prayagraj panin pathian biak tum tam tak an kal dawn tih hriat sa a ni a, station-ah hian ruahmanna fel fai zawk siam tur a ni,” tiin X-ah a tar lang.