Kar kaltaa New Delhi a tlawh tumin Mizoram chief minister thar Lalduhoma chu Delhi Mizo Welfare leh Delhi Mizo Zirlai Pawl ten lawmpuina an lo hlan.
Delhi Mizoram House-a hun hmannaah hian Delhi-a sawrkar hnathawk Mizo officer awmte leh company lama thawkte nen Mizoram tana hmasawnna tur rahbi awm nia an hriatte an sawi ho a. Mizoram sawrkar tana hma an lo lak ve theihna lam thil an lo thlen.
Chief minister hian Kolkata a tlawh haw bawk a. Kolkata Mizo Welfare chuan Mizoram House-ah lawmpuina buatsaihin an inkawm a, an mamawh an lo thlen a ni.
Kolkata Mizo hruaitute hian damlo awmna an indaih loh thin thu sawiin, Ballygunge-a Mizoram sawrkar hmunhma, hralh tura ruahman mek sawrkar tharin hralh loh tura a ti leh ta chu lawmawm an tih thu an lo hrilh. Damlo tan leh Mizote inhmuh khawmna tur ni telin in sak nise an duh thu an lo thlen a. Damlote MR bill-a harsatna an tawh chungchang an lo thlen bawk.
Delhi-ah CM an lawmpui
