Mizoram Handloom & Handicrafts Development Corporation Ltd. (ZOHANDCO) hmalakna a din, New Delhi Safdarjung Enclave-a 102 Humayunpur ami MadebyMizo Kiosk chu August 7 khan chief minister Lalduhoma’n a hawng.
MadebyMizo Kiosk hi Mizo thilsiam hrang hrang zawrhna dawr a ni a. Sawrkar laipui Ministry of MSME hnuaia scheme pakhat RAMP hmang a din a ni. ZOHANDCO chu he scheme-ah hian state nodal agency niin, he scheme hnuaia component pakhat, marketing intervention bikah mawhphurhna a la bawk.
Marketing intervention hnuaiah hian ZOHANDCO chuan MadebyMizo.com (e-commerce) platform a siam tawh a. He e-commerce a Mizo siamchhuah bungrua an ziahluh chu a taka zawrhchhuah a nih theihnan MadebyMizo Kiosk hi din a ni. New Delhi bakah Bengaluru leh Kolkata-a din turin ZOHANDCO chuan hma a lak mek.
Heng Kiosk atang hian bungrua hralh chhuah an ni anga, e-commerce atanga online order awm, Aizawl atanga thawn vek loin, heng kiosk atang hian an pechhuak thei dawn a. MadebyMizo Kiosk hi square feet 750-a lian a ni a, a dinna atan hian cheng nuai 71.41 hman a ni.
A hawnna puala Chief Minister’s Grand Dinner neihah chief minister chuan, Mizorama public sector undertaking chu sawrkar tan phurrit ni thin an ni a, an sawrkar hnuah siamthat hna nasa takin an thawk a, tunhnaia ZOHANDCO hmasawn dan hian chu chu a lanchian tir tih a sawi a ni.
Delhi-ah ZOHANDCO-in dawr a hawng
