Demand Committee-in Session
hmasaberah bill thar pawm ngen
Lunglei-a State University dah tura chief minister-in a tih tawh angin, Assembly Session hmasa berah State University Bill thar puluta pawm turin Mizoram sawrkar an ngen nawn tih Demand Committee chuan an sawi.
Mizoram State University Demand Committee Lunglei thuchhhuak chuan, chief minister Pu Lalduhoma’n State University Lungleia din a nih tur thu leh Aizawla dah tura dan an lo siam tawh tih danglam a nih tur thu a sawi chu lawmawm a ti a. Mizoram hmun hrang hranga hmasawnna rualkhai zawk a thlen theihna atana hmalakna leh zirlaite hmakhua a ngaihtuah avangin fakawm an ti tih a sawi.
Demand Committee-in chief minister a ngenna kalzelah HPC vice chairman Pu V Malsawmtluanga pawhin Lungleia institution-te upgrade a, State University-in a huam tel (cluster college) theihnan hma lak a nih tur thu a sawi pawh lawmawm tiin, chief minister leh HPC vice chairman-te sawi ang hian, Assembly Session hmasa berah State University Bill thar puluta pawm turin sawrkar an ngen tih sawiin, a hlawhtlinna hmel a taka hmuh a nih hma chuan State University chungchang hi a tawp thlengin an vil zel dawn tih a sawi a ni.
Lungleia State University dah a nih theihna atana Demand Committee hmalakna thlawptu leh thawhpuitu, NGO leh kohhran hruaitute bakah chhim mipui chungah leh, chhim lam aiawh MLA leh minister-te thawhhona lehah lawmthu an sawi tih a sawi bawk.
Demand Committee-in Session hmasaberah bill thar pawm ngen
