Demand reduction lama tan lak nat….

Nimina Vanapa hall-a International Day Against Drug Abuse & Illicit Trafficking, 2024 hmannaah chief minister chuan, drug laka kan fate an him theih nan chhungkua kan pawimawh a, nun kawng dik an zawhna tur a nih phawt chuan khauh taka khuahkhirh hi i hreh lovang u; chu chu Pathian pawhin a phal a ni, a ti a; ruihhlo do chu mi tin huapa do ngai a ni tiin thawhpuiah mipui a sawm a.
Drug-in Mizoram a chiah hneh tawh dan kan hria a, ruihhlo a pung a, ruihhlo ngai thalai an pung bawk a, thihpui thalai an pung zel bawk a. Ruihhlo kan do danah hian ko thlak a ngai a ni lo maw tihturin ruihhlo kan do nasat ngaihtuahin kiam lam a la pan thei lova, a pung tual tual a ni mai a. Ruihhlo dona lamah hi chuan tha leh zung, sum leh pai leh hun kan seng nasa tawh hle; mahse, tun thlengin awmzia a la nei thui tak tak thei lo.
Supply reduction hi a pawimawh em em rualin, a aia pawimawh chu ‘demand reduction’ hi a ni. Supply te chu khawlaiah let rem rum mah se, a demand-tu an awm miau loh chuan rei a daih thei tak tak lo. Chuvangin, ruihhlo do tura a step hmasa ber chu ‘Chhungkua’ hi a ni. Chhungkua atanga inenkawlna dik a awm chuan ruihhlo hian min chenchilh rei thei lovang.
Chhungkua a pawimawh han tih liam ngawt pawh hi, chhungkua khawsak phung leh dinhmun a inan loh avangin, tawngkama sawi liam mai hi a tawk lova, chhungkaw tana awareness campaign neih hi thil pawimawh tak, tihmakmawh a ni a. Hei hi demand reduction hnuaia hmalakna pawimawh tak a nih avangin tan kan lak nat a ngai hle tih a lang. Sawrkar chuan demand reduction lam buaipui turin social welfare & tribal affairs chu mawhphurtuah a dah a, tlawmngai pawl hrang hrangte nena thawhho thiam a sawt hle dawn tih a lang.
Chhungkaw dawtah hian, khawtlang inkaihhruaina dan hnuaia hmalak pawh hian awmzia thui tak a nei tih chu YMA branch hreng hrangin thalaite ko khawma thu tha an hrilh thin atang hian thalai tam tak chuan ruihhlo an do phah ve bawk. Hei bakah hian ruihhlo do pawl hrang hrangin zirna in hrang hranga zirlaite fuihna neia an tlawh kual thin pawh hi a sawt hle tih a lang. Chuvangin, mipui hi demand reduction lamah kan tanrual theih phawt chuan ruihhlo do hi a sawt ngei ngei ang tih a lang reng a ni.