Dembele kutah 2025 Men’s Ballon d’Or
Thawhtanni zan Paris khawpuia Ballon d’Or award hrang hrang semnaah mite ngaihven hlawh ber 2025 men’s Ballon d’Or trophy chu Paris Saint-Germain leh France forward Ousmane Dembele kuta hlan a ni a, dawn beiseiawm zinga mi Barcelona leh Spain national team tana harhtharna thlentu tih theih khawpa thawm nei lian Lamine Yamal chu vote hmu tam pahnihna a ni!
Kum 28 mi Dembele hian season liamta 2024/25 khan PSG chu an club chanchina a vawi khatna atan UEFA Champions League trophy lakpuiin, kum kaltaa a sulhnu hnutchhiah a hraw hlawm hle a.
Champions League title bakah 2024/25 season-ah khan Ligue 1 title leh French Cup lakpuiin, PSG tan belhkhawma match 53 a khelh atangin France forward hian goal 35 leh assist tum 14 a nei tling.
Goal 21 thunin Ligue 1 bikah joint top scorer a ni a; French top flight leh Champions League player of the year atan thlan a ni bawk.
PSG chu Club World Cup final thlenpui mah se New Jersey khawpuia final-ah match-ah Chelsea an hneh ta lo a ni.
Champions League-ah khan assist siamchhuak hnem ber dawttu niin, he inelnaah hian chance ngah ber a ni bawk.
Dembele hi French player zinga Ballon d’Or dawng thei parukna niin, a hmaa mi huai kalhmasa – Raymond Kopa, vawi thum dawng Michel Platini, Jean-Pierre Papin, Zinedine Zidane leh Karim Benzema-te hnung a zui ve ta a ni.
Argentine great Leo Messi hnu lama Paris Saint-Germain player zinga Ballon d’Or dawng leh thei hmasa ber a ni nghal bawk.
Engnge a sawi?
Paris ceremony-a lawmman dawng tura a dinchhuah laiin rinkai ber tih ngam Barcelona rawlthar Yamal hmakhalh thei Dembele khan a mittui a dang zo lo a, a nuin stage-a a lawnkaipui hnuah thu sawiin:
“Ka hun tawn hi a va dangdai tehlul em. Thu mai chuan ka sawifiah zo lo a, PSG-a thil thleng pawh ka sawi chhuak zo lo ang. Ka la dik lo tlat mai.
“He trophy dawn hi thil awlsam a ni lo a, chutah football legend Ronaldinho kut atang ngeia dawn phei chu beisei phak piahlam a ni.
“Kum 2023-a min sengluttu PSG chungah ka lawm a, chhungkaw mak leh ropui a ni. President Nasser (Al-Khelaifi) pawh hi ka tan chuan pa tluk a ni. Staff zawng zawng leh pa ang maia ka en dang, ka tana hlu chungchuang kan coach chungah pawh ka lawm a, ka team-mate zawng zawngte chungah pawh lawmthu ka sawi nghal e.
“Hnehna kan changho dial dial a, hun tha leh harsaah min thlawp tlat a, he mimal trophy hi team-in a huhoa kan lak a ni,” tiin amah maia footballer chawimawina hlu bik hi dawng thei a nih loh thu a sawichhuak.
He forward hi Barcelona lamah khan hliamin a lo tibuai hrep tawh a, Thawhtannia Ballon d’Or a dawn lai pawh khan inkhel thei loin a inhliam mek a, thlipui avanga a hun taka khelh theih loh Thawhtanni zana an khelh tak Marseille muala sikhat faia PSG tlawmna match-ah pawh khelmual lut thei zawngin a khawsa lo hrim hrim!
Nikum December thla laihawl atanga a tactic thlakdanglam ta PSG manager Luis Enrique kha coach of the year atan pawh tuntum hian thlan a ni a; he Spanish coach hi Dembele award dawn theih kawnga sulsutu pawimawh a tih theih ang.
Team khelh dan a sawidanglam takah nikum December ni 15 khan Dembele hi dinglam sir atangin centre-forward role a pe a, khatih lai khan French forward hian PSG tan goal nga chiah a la khung a; coach-in a tlanna a siksawi hnuah chuan a thun chho ta mawlh mawlh a, season a tawp meuh chuan goal 30 lai a khungbelh ta a ni.
Barcelona-in kum 2017 daih tawha Borussia Dortmund hnena sum hmahruai pound maktaduai 96.8 zet phawrh inhuam chunga Dembele an dil fat fat chhan kha PSG-ah he mihang player nungchang zawiawi ve lam hian a pholang ta tak tak a tih theih a, pound maktaduai 135.5 kai chho thei tura Catalan team-in an lei ngam chhan quality dik tak kha an ram club behchhanin a lantir ta kan ti thei ang!
2025 Ballon d’Or awards-a team of the year atana thlanchhuah PSG hian kum 2023 khan Dembele hi pound maktaduai 43.5 lekin an lei chhuak a, Messi leh Neymar an lakluh ai pawh khan a fuh zawk mai awm e!
Dembele hian kum 2024-25 season chhung khan France tan pawh match sarih khelin goal hnih a thun tling.
Frenchman zinga he chawimawina dawng thei parukna a nih rualin kum 2022-a dawngtu Benzema hnu lama kum zabi 21-na chhunga dawng leh thei hmasaber a ni nghal bawk.
Vote hmu tam top 10 player zinga panga lai kha season liamtaa PSG team innghahna player an ni vek a, Dembela baka vote hmu tam 10 zinga lang phate chu – Vitinha (third), Achraf Hakimi (sixth), Gianluigi Donnarumma (ninth) leh Nuno Mendes (10th)-te an ni.
Liverpool forward Mohamed Salah chu palina niin, Chelsea leh England star Cole Palmer chu pariatna a ni.
Nikuma he chawimawina dawngtu Manchester City leh Spain midfielder Rodri kha hliamin a tihbuai tak tlat avangin tuntum hian shortlist zingah pawh a lang pha ta lo a ni.
Gerd Muller Trophy
Top scorer trophy dawngtu Viktor Gyokeres khan 2024-25 season-ah Portuguese club Sporting tan game 52 atangin goal 54 a thun a, Arsenal lamah a insawn san ta a ni.
Gunners striker ni ta Gyokeres hian top scoring player lawmman Gerd Muller Trophy dawngin, season liamta khan European football-ah club leh ram tan belhkhawma goal khung hnem ber a ni a; Sweden tan Nations League game rukah goal kua lai a khung tling bawk.
Kumin nipui thawt laia north London club-in an leina man pawh pound maktaduai 64 kai chho thei tura ziah fel a ni.
A hma leh chiah season-ah khan Gerd Muller Trophy hi Bayern Munich forward Harry Kane leh Real Madrid thuam inbel ta, PSG star hlui Kylian Mbappe-te’n an indawntawm a, goal 52 ve ve an thun.
A hma leh kumah Robert Lewandowski leh Erling Haaland-te’n an lo dawng dun tawh bawk.
Kopa Trophy
Kumina Ballon d’Or dawng tura rinkai leh amah pawhin a inrin laia dawng zo leh ta lo Lamine Yamal chuan nikum ang bawkin kum 21 chin hnuai lam zinga best player chawimawina Kopa Trophy chu kum zawnin a dawng leh ta zawk a, amah pawh a lawm lo hle tih hriat a ni!
Barca rawlthar kum 18 mi Yamal hi kum 2018 atanga semchhuah tan Kopa Trophy tum hnih dawng thei hmasaber niin, season liamta khan a club vawn lai chu domestic double nihpuiin, La Liga leh Copa del Rey trophy a lakpui.
He mihang winger hian game 55-ah goal 18 thunin, chu’ng zingah chuan Clasico pathuma goal a khung kim vek a tel bakah assist tum 21 a siamchhuak tling bawk.
Spain chu Nations League final thlenpui bawkin, penalty hmanga chak zawk zawnah Portugal an hneh ta lo a; semi-final lama Dembele telna France laka 5-4 hnehna an chan tumin goal hnih a khung nghe nghe.
Johan Cruyff Trophy
Top manager award dawngtu chu Paris St-Germain boss Luis Enrique niin, 2024-25 best men’s coach trophy dawng turin kum 55-a upa Spaniard hian season tan tira chhuak ta star man Mbappe tel loin PSG chu a vawi khatna atan Champions League trophy a lakpui a, ex-Barcelona coach hi Pep Guardiola hnu lama club hrang pahnih treble champion nihpui thei hmasaber a ni.
Socrates Award
He chawimawina hi Luis Enrique-te chhungkuain kum 2019-a ruh cancer vanga kum kaw mi lek an fanu sun tak puala charity an buatsaih Xana Fundacion an tih chuan dawngin, mahni mihringpuite tana hna thawk tha chawimawina a ni.
He foundation kaltlanga sum an hmuhte hi an nunna atana hlauhthawnawmn khawp natna vei naupangte tanpuina atan a boa bang awm loa chhunluh thin a ni.
Thawhtanni zan khan Ligue 1 khelh hun sawn danglamah a team chu Marseille khelmual a luhpui a ngaih avangin Enrique hian an foundation din lawmman dawn pawh hi a dawng ve thei ta lo a ni, a coach trophy nen.
Yashin trophy
Kum 2024-25 chhunga goalkeeper tha ber chawimaiwna Yashin trophy hi Italy goalkeeper Gianluigi Donnarumma chuan dawngin, Paris St-Germain tana a chetthat vanga dawng a ni a, tunah tak chuan Manchester City kutkawr a bun tawh.
Kum 26 mi hian kumin nipui transfer deadline day-a pound maktaduai 26-a City a zawm hma season liamta khan treble winners an nihna kawngah PSG tan a thawhhlawk a, game 47 a khelhah tum 17 zet goal chhuah loh a nei tling!
Donnarumma hian kum 2021 pawh khan he award hi lo dawng tawhin, Euro 2020-a player of the tournament atana thlan a nih hriatpuina a tih theih ang!
Liverpool goalkeeper Alisson Becker chu kumin keeper award dawng tur thlannaah hian vote hmu hnem pahnihna a ni.
Aston Villa leh Argentina keeper Emiliano Martinez chu Yashin trophy hnuhnung pahnih huitu ni mah se kuminah erawh vote hmu tam pariatna a ni pha ta chauh!
Dembele kutah 2025 Men’s Ballon d’Or
