Dengue vei pun loh nan thosi luman chhiar

Dengue vei pun loh nan thosi luman chhiar
Philippines-a mihring cheng an tamna laia hmun pakhatah chuan sorkarin dengue vei tam lutuk tihtawp nan thosite luman a chhiar.
Manila laili, Barangay Addition khaw lai, Carlito Cernal chuan thosi panga zel man emaw, that emaw hnenah peso khat (US cent hnih aia tlem) a pe zel.
Thosite luman chhiar a nih thu hi social media-ah darhin sawi zui a hlawh hle a; mahse, Cernal-a chuan an khawtlang hrisel nan a tul niin a sawi ve thung.
Tun hnaiah Philippines-ah hian thosiin an put darh dengue vei an pung nasa hle a ni.
Tuna an thil kalpui hi thla khat vel awh tura tih a ni a, Cernal-a thenawma zirlai pahnih an thih atangin hetiang hi kalpui tan a ni.
Luman dawngtute hian thosi chu an that emaw, a nung chungin emaw an man a ngai a. A la damte chu ultraviolet light hmangin an tihlum thin.
Nilaini thleng khan mi 21-in luman hi an dawng tawh a, thosi 700 chuang an that tawh.
Social media-ah miin nuihzat deuh mah se Philippines-a Department of Health (DOH) chuan tual chhung sorkarin dengue laka beihpui a thlak chu a lawmawm an tih thu an sawi ve thung.
Thosi mana sum nena inthleng hian dengue a titlem thei ang em tih zawhna erawh an chhang lo.
Cernal-a chuan social media-a an sawi zuina chhangin, “Kan chenna hi mihring bitna leh tam em emna hmun pakhat a ni a. Tual chhung sorkar hi eng emaw ti tala kan puih ve a ngai a ni,” a ti.
Hriselna thuneitute chuan tun hnaia a vei pun hluaiah heng lai velah hian mi 44 vei thar hmuh a nih thu an sawi.
Barangay Addition Hills hi mi 70,000 dawn chenna niin an khawpui laili, Metro Manila-a hectare 162 huam chauhva zau a ni thung.
Cernal-a chuan thosi luman siam hi khawlai tihfai leh dengue pai thosi pai pianna tui tling tur siam loh kalpui mek thlawptu pakhat a nih thu a sawi.
Dengue hi tropic ramah a tam a, khawpuia mihring bitna, faina lama chhe si-ah a tam zual thin.
A tuar na zualah chuan kawchhunga thiput siamin thihna a thlen thei a. A vei hi an lu a na a, an lu a hai a, an ruh inzawmna nain an sil thum thin bawk.
Philippine thuneitute chuan ruah sur hun lai a nih avangin ram pumah dengue vei an pung tih an sawi a. DOH chuan February 1 khan a vei mi 28,234 chhinchhiah niin a hma kum aiin 40%-in an tam tih a sawi.