Art & Culture leh Horticulture department chan tur, festival hman thin tihtawp leh a thar hman tur chungchangah Tourism minister chuan a lo rel khalh tih MNF Thalai chuan an sawi a. Zilhaua action la turin Val Upa Council leh chief minister an phut tih an sawi
MNF Thalai Hqrs. thuchhuak chuan, Tourism minister Pi Lalrinpuii hian ama department subject pawh ni lo, Anthurium Festival titawpa a aiah Leitlangpui Music Festival neih tur thu a sawi tih sawiin, sawrkar department hrang hrangte hna leh mawhphurhna insemna dan – Mizoram Allocation of Business Rules 2019 ah music chu Art & Culture thuneihna (subject) a ni, tia dah a nih bakah RTI zawhna Art & Culture department-in an chhannaah, music leh a kaihhnawih chu sawrkar dan dinglai angin an thuneihna a ni a, Tourism minister-in Lungleia Music Festival huaihawt tur a sawi hi official-in an hriatpui lo, tia chhan a ni tih a sawi.
‘Allocation of Business Rules 2019 angin music hi Tourism department subject list-ah a tel lo a. Hetiang a nih lai a, amah aia minister senior zawk, Art & Culture minister Pu C Lalsawivunga palzuta Music Festival chungchanga thutlukna a siam hi kalphung thar tha lo tak a ni. Val Upa Council-in zilhhau thuai se, he dan bawhchhiatna avang hian chief minister pawhin action a lak kan phut a ni,’ a ti.
Anthurium chu Horticulture department subject a nih thu leh a puala festival siam thin pawh Tourism leh Horticulture department-in tangruala an huaihawt thin a nih laiin, Tourism minister-in Horticulture minister, department official-te leh anthurium chingtu society (ZAGGS) pawh rawn loa ama thua a titawp ngawt chu thuneihna hmansualna (misuse & abuse of power) a ni tih MNF Thalai hian sawiin, India rama tourism award sang ber ‘Best Tourism Village of India Award 2023’ Reiek khuain a dawn theih chhan pawh Reieka Anthurium Festival hlawhtlinna hian a thawhhlawk hle tih a sawi a ni.
‘Tunhnaia Horticulture minister-in Zo Anthurium Grower Society Ltd Collection Centre Ramhlun North a tlawhnaa Anthurium Festival neih zui an lo rawtna a thlawp thu leh neih zui zel a nih nan puih a tum thu a sawi kha tha kan ti a. Dan bawhchhetu Tourism minister dodala a subject neitu ngei Horticulture minister Prof Lalnilawma’n Anthurium Festival neih chhunzawm zel dan tur a ngaihtuah hi a tihawm tak ti a ni,’ a ti.
Lungleia Music Festival neih tha an ti a, dan dinglai angin Art & Culture department ngeiin huaihawt se an tih thu MNF Thalai hian a sawi a. Anthurium Festival tihtawp phah kher loin, a subject neitu Art & Culture-in huaihawt mai se a that zawk an ring tih a sawi.
Health minister ni bawk Pi Lalrinpuii chu sub-health centre takngial pawh a awmlohna khua 235 a sawrkar hmasain Health Clinic Centre 235 a din leh a taka mipuiin an chhawr em em a tihtawp vek avangin khaw 235 hian hriselna kawngah harsatna an tawk a, tinung thar leh turin an phut tih a sawi a. Sawrkar laipuia ZMC hlan a tum pawh tlawma la loin sut lehna siam thuai se, tun hnuah sawrkar hmasa tih sa thiat zel loin thil thar ngaihtuah chhuak ve se tih chu minister-te an beiseina a ni tih a sawi bawk.
Department dang chan tur Tourism minister-in a lo rel khalh – MNYF
