Sawrkar department thenkhatin power supply bill an pek that loh avangin Power & Electricity department performance report chu a tha lo zawngin a nghawng thin tih sawi a ni. Kawlphetha semchhuah kawnga riral (energy loss) tih tlem dan tur leh revenue lakluh kawnga hma sawn theih dan tur relin Thawhlehni khan Power minister F Rodingliana hoin department hotute an thukhawm a. Sawrkar department thenkhatin power bill an bat nasat avanga performance report a tha lo zawnga a nghawng dan leh he harsatna sukiang tura department dangte nen thawhhona tha zawk neih dan tur sawiho a ni.
Aizawl khawpui chhunga power distribution line dinhmun tihthat zawkna tur leh dik zawka billing tih a nih theih nan power hmang tam consumer-te connected load MDI (maximum demand indicator) reading la a, zirchian nise, an ti.
Department chhunga thawktu indaihlohna tih kianna’n nasa zawka outsourcing kalpui chungchang sawi niin, tun dinhmunah Suangpuilawn leh Phuaibuang khuaa outsourcing kalpui mek chu mumal taka zirchian tum a ni.
Tunhnaia electric hrui leh transformer a thara thlak mek a nih avanga mipuiin power supply an dawn that loh dan pawh sawi a ni a. Power tikhaihlak tlem zawnga chak zawka hna thawh dan tur sawi a ni.
Consumer-ten a hun taka eng chhit man an pek pawimawhna, dan ang thlapa dik taka electric connection pawh chu mipui tan a him zawk thu leh meter reading chungchang uluk lehzuala inzirtir a pawimawh thu sawi a ni bawk.
Thutkhawmah hian Circle hrang hranga superintending engineer theuhten an bial chhunga consumer-te bill pek dan leh bill collection chungchanga hmasawnna atana rawtna an neihte power point presentation hmanga entirin sawiho a ni.
Department thenkhat power bill ba tamin P&E dinhmun ti tha lo
