Aizawl East-I bialah a ni aia development luh tir nasa an awm a rin loh rual leh inthlan hmasa aia vote a hmuh tam zawk laiin, a chak zo chuang lo tih MNF president Zoramthanga chuan a sawi.
Inrinnia Aizawl East MNF Block thutkhawm a hmanpuinaah Zoramthanga chuan, kalphung thar sawrkarin Congress leh MNF thlak hrim hrim a tul thu an tlangaupui thiam em em a, han thlir thuak chuan a awm ve viau a ni tih a sawi. “Aizawl East-I bialah kum 2018-a ka vote hmuh aiin 2023-a ka vote hmuh kha a tam zawk daih a, mah se kan chak ta chuang lo a nih kha. Ka bial chhungah kei aia development kha ai a nasa kha midangin an luh tir ka ring bik lo. Mahse kan chak zo ta chuang loa, Pathian remruatah kan pawm thlap tho,” a ti.
Tunah chuan mipuiin ZPM ministry chu an hrechiang chho ta hle tih MNF hruaitu hian a sawi a. “Airport hralhna an zawng, ZMC hralh an tum leh bawk. Thildang pawh thawm a awm chho zel a, an mangang ve hle tih a hriat. SASCI hna leh sum awmsa kha ZPM sawrkar thar khan an ipte ah an ak tawp ringawt mai a ni ber a, sanction a nihna ang pawha hmang loin, cheng vaibelchhe 150 SEDP leh SASCI sum vaibelchhe 230 kha min petute min pek chhan ni lo, sawrkar hnathawk hlawhah an pe a nih kha. Central-in hnathawhna tura a sanction tawh, an duh duh dana a pawhsawih avangin court emaw central emaw hian a guideline anga an tih loh vangin state sumin a rulh tir a nih chuan, kan state hian sum lama kan hmachhawn tur hi a namai dawn lo hle,” a ti.
Aizawl East MNF Block thutkhawmah hian sawrkarin chhuanlam hrang hrang avanga local council/ village council inthlan sawn hnaih an tum chungchanga lo inhmakhua dan tur leh party kal zel dan tur an sawiho tih sawi a ni.
Development luh tir nasa mah ila kan chak zo ta chuang lo – Zoramthanga
