Zirtawpni khan Samajwadi Party MP Jaya Bachchan leh Rajya Sabha Chairperson Jagdeep Dhankhar te chu tawngkaa inbeiin Jaya Bachchan chuan ‘i tone (thluk, rik dan) pawm a ni lo’ a ti a.
Dhankhar thinrim chuan chhang letin, “Zirtir nih ka duh lo” tia chhang letin Bachchan chu, “Celebrity i ni mai thei a, mahse, chethmang mawi i hriatfiah a ngai” a ti let a.
Heng thil thlen hma hian Bachchan chuan amah introduce na a neihah Jaya Amitabh Bachchan tiin a insawi a, he mi hnu hian Dhankhar chuan ‘i thutnaah thu rawh’ tiin a lo dangchat a ni.
“Sir, Jaya Amitabh Chachan ka nia, ka sawi duh chu, actor ka ni. Chuvangin body language leh expression te ka hrethiam a, min hrethiam la, i tone kha pawm theih a ni lo. Thawkho kan ni a, sir, Chair ah i thu a ni thei a, mahse ka hriatreng chu school kan kal laiin…” a tih laiin Dhankhar chuan kut vaiin thu turin a lo ti a.
“Jaya, i thutnaah thu rawh, thu rawh” tiin Dhankhar chuan a sawi a, House thawm a tha hle a ni. “Member zahawm tak te u, thu rawh u, engtia kalpui tur nge tih ka hria” a ti zui bawk.
Chumi hnuah Dhankhar chuan Bachchan lam hawiin, “Jayaji, hmingtha tak i ni tih pawh ka hria. Mahse, actor chu director hnuaia awm a ni a. Heta tanga ka hmuh ang hi i hmu ve lo. Nitinin, sawi nawn ka duh lo, zirlai emaw min tih reng hi ka duh lo. Kal chhuak tawh ka ni a, chutih laiin ‘ka tone’ i ti a maw” a ti a. “A teuh lo mai, a tawk tawh. Engmah ni lo i ni thei a, celebrity pawh i ni thei a, mahse, chethmang mawi i hriatthiam a ngai a ni” tiin Dhankhar chuan thinrim taka kutvaiin a sawi a.
Hemi hnu hian Congress veteran Sonia Gandhi kaihhruai opposition MP te chuan Bachchan an thlawp zia lantir nan House an chhuahsana House debates ah an telve remtihsak an ni lo an ti zui bawk.
Congress Secretary Jairam Ramesh chuan Parliament ah Opposition MP te chu hmuhsita awmin an tawng ve remtihsak an ni lo a ti a. Shiv Sena (UBT)’s Priyanka Chaturvedi chuan Bachchan chuan ‘Vice President letin parliamentary experience a nei tha zawk’ a ti a, Trinamool Congress MP Dola Sen pawhin Jaya chu MP tum li a ni tawha zah a phu a ni a ti bawk.
Jaya Bachchan chuan ‘tawnhriat zahthlak tak a ni’ tia sawiin opposition MP te laka chetdan chu a sawisel bawk a. “Chair atangin eng pawh sawi remtih a ni a, Chair pawnah chuan Chair-a thu chu keimahni ang tho MP a ni. Chair in a tone hman kha ka duh lo va School naupang kan ni lo va, a thente phei hi chu senior citizen kan ni tawh. A tone hman kha ka duh lo va, a bik takin Leader of the Opposition (Congress chief Mallikarjun Kharge) thusawi tura a dinin Chair in a mic a off sak a ni” tiin a sawi bawk.
Heng mai bakah hian tawngkam hman te a parliament tawngkam lo a ni ‘chimawm’ tih te, ‘celebrity i ni mai thei a, engahmah ka ngai lo’ tih ang te. Ngai turin ka ngen lo, an tawng ang hian Parliament ah tumah an tawng ngai lo. Hmeichhia te zah lohna nasa tak a ni, tiin Jaya Bachchan chuan a sawi bawk.
BJP te chuan Opposition te chhuak tau chu thinrimpui thungin BJP chief leh Rajya Sabha MP JP Nadda chuan opposition te chetdan chu ‘mawi lo leh zahawmlo’ tiin a sawi a. “Opposition te hian he ram hi chau se an duh a ni, ngaihdam an dil tur a ni” a ti a. “Politics standard a tlahniam ta hle mai a. Party leh mimal an dodal bakah tunah chuan ram an dodal a, ram hi thendarh an duh a ni” tiin a sawi bawk.
Dhankhar leh Bacchan te boruak sang
