Digestive system hrisel nan
Kan digestive system hian hna pawimawh tak an thawk a, kan chaw ei te chu chakna leh nutrient-ah te lo siamin, chu chu kan taksain a nitin hna a thawh theih nan an lo hmang ve leh thin. Chuvangin kan digestive system hi taksa peng pawimawh tak, kan hriselna kengtu pakhat a ni.
Kan ei leh in reng reng hian kan digestive system hriselna a nghawng nghal zel a, kan ei leh in a dik loh chuan kan pum a buai nghal a, chu chuan indigestion, thinthip, leh pum lam buaina chi hrang hrang a thlen thei. Tun tumah hian Times of India health section-in digestive system hriselna atana tihtur ni a an sawi te kan rawn tarlang e.
1. Thil kha (bitter) ei tam rawh. Thil kha leh thur lam hi tui kan ti lo a nih pawhin pum tan a tha tih hriain ei tam tum tur a ni. Thil kha leh thur hian kan digestive juice a harh a, chu chu kan thil ei te lo tisawm a, chakna atana kan hman zung zung theih nana lo hip thuai thuai theih nan a pawimawh. Thil kha lam chi chawhmeh a ei tam bakah, chaw ei hma darkar khat velah sertui leh tui chawhpawlh in emaw, apple cider vinegar leh tui chawhpawlh in emaw a tha bawk. Hei hian digestion a tichak thei.
2. Spice hi pum tan a pawi hran lo. Chawhmeh tihrimtuinan kan hmang nasa a, taksa hriselna atan pawh thatna a ngah mai. Kan chawhmehah spice chi hrang hrang telh a tha. Sawhthing te hi indigestion nei tana tha tak a ni, pum nuam lo leh digestion lama buaina nei tan a tha a, luakchhuak tideuh-nghulh leh pum puar ul tih ziaawm nan pawh a tha hle.
3. Chet tam tur a ni. Kan pumin kan thil ei te ‘digest’ a tum laia lo mut te hian indigestion a thlen thei (indigestion hi dyspepsia te pawh an ti a, pum chunglam (upper abdomen) nawm loh dan chi hrang hrang a nuam lo hi a ni dueh ber mai). Taksa sawizawi that a pawimawh a, exercise lak te hi pum hriselna atan a pawimawh a, kan taksa kan sawizawi a kan tihchet hian kan digestive system a chaw kal vel te a tichak thei. Chaw ei kham a rei vak lo walk te pawh digestive system hrisel nan a tha.
4. Tui intam tur a ni. Tui hi kan taksain a mamawh tam hle a, kan puma kan thil ei te an chet vel zung zung theih nan tui in tam a pawimawh. Tui kan in tam tawk loh chuan kan ek (stools) tura tui awm te chu kan taksain a hip let leh a, ek khal te kan neih phah thei. Hei bakah hian digestive juice siam nan kan taksain tui a mamawh bawk. Nikhatah tui litre 3 tal in tum tur a ni. Tui ringawt in harsa kan tih chuan fruit juice, buttermilk leh lemonade te pawh kan tuiril lakluh tihpun nan a tha.
Digestive system hrisel nan
