Daily Newspaper

Digital hmanga sum virkual tir uar a tul – Chief Secretary

7

Mizoramah pawisa leh pawisaa indawr loa digital hmanga sum inpek lam kan la hmang uar tawk lo tih chief secretary Lalnunmawia Chuaungo chuan a sawi a. Tun hrileng mek karah phei chuan hetianga sum virkual tir hi a tul lehzual tiin, bank-te chu heti lama mipuite hrilhhre tam turin a chah.

State Level Bankers Committee (SLBC) Mizoram thutkhawm chu Nilaini khan video conferencing hmangin an chairman, chief secretary ho hian neih a ni a. Sawrkar kum 2020-2021 September 2020 quarter-a Mizoram chhunga bank awmte hnathawh an thlirlet.

Chief secretary chuan Mizorama digital payment system kan la hmang uar lo chu hman uar inzirtir a ngai nasa hle tih a sawi a. A bikin Covid-19 hrileng karah digital payment system hman uar hi a tul hle, tiin, bank-te chu hemi chungchangah hian tan la thar turin a chah.

Eizawnna kawngah pawh tunlai khawvel thlirin boruak chhe tak karah hian sericulture farming uar a tul tih a sawi a. “Mizoram boruak hi pangngang khawi nan India ramah a tha ber tih a ni a. Kan leilungte hi organic an ni vek mai a, chuvangin organic farming uar a tul. Bank-in loan a pekchhuahte pawh helam hawi zawng hian uar ila, kan CD Ratio te pawh a sang thei ngei ang,” a ti.

Thutkhawma report danin, Mizoramah bank chi hrang hrang 24 a awm mek a, heng bank-te branch neih chu 210 a ni. Public sector bank-in branch 81, private sector bank branch 24, regional rural bank branch 88 leh cooperative bank branch 20 an ni.

Sawrkar kum kal mekah September quarter thleng hian heng bank hrang hrangtea sum dahluh chu cheng vaibelchhe 13615.89 a ni a, bank-in a pekchhuah chu Vbch. 5287.49 niin, Credit-Deposit (CD) ratio hi 38.84% a ni.

Bank loan pekchhuah hi priority sector-ah vbch. 640.45 a ni a, advance zawng zawng atangin priority sector-a puktir hi hi zaah 35.07 a ni. Agriculture lama advances hi vbch. 77.30 a ni a, advance zawng zawng atangin agriculture advance bik hi zaah 13.80 a ni. MSME (industry leh business) advances chu vbch. 344.35 a ni a, advance zawng zawng atangin hemi bika pekchhuah hi zaah 37.15 a ni.

September quarter chhunga Annual Credit Plan achievement chu 35.57% a ni a, priority sector bik achievement chu 35.07 % a ni.

Thutkhawmah hian 2020-2021 kum atan NULM hnuaia self employment programme loan pek tur target hrang hrangte Saitual district-a MRB leh MCAB branch tharte tan pawmpui a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy