Chakma Autonomous District Council hotu hlui pahnih leh midang pakhat chu dik lo taka sawrkar sum hmanga an inhnamhnawihnaah court-in thiam loh chantirin kum li chhung lung in tang tur leh cheng nuai thum chawi turin a hrem.
Special Court (Prevention of Corruption Act) chuan dik lo taka mipui sum hman a nih chungchangah Chakma Autonomous District Council (CADC) a chairman hlui Kali Kumar Tongchangya, a fapa Julius Tongchangya leh CADC deputy chairman hlui Purna Muni Chakma te chu eiruk thubuaiah thiam loh a chantir a.
He thubuai hi 2019 April 9-a Bangalore-a hmunpui nei United Chakma Alliance vice president Udondi Chakma-a’n Mizoram Lokayukta-a a thu thehluh, mipui sum dik lo taka hmanga Kali Kumar Tongchangya a puhna atanga intan a ni. Lokayukta hian Anti Corruption Bureau hnenah pe-in, thubuai hi kum 2021 atanga chhui tan a ni a; KK Tongchangya hi a fapa Julius Tongchangya, chutih laia Uttarakhand khawpui Dehradun-a Doon (PG) College of Agriculture Science & Technology-a BSc (Horticulture) zirlai chu, a tak taka hman si loin a personal assistant atana laa puh a ni. A taka thawk si loin, chawlh pe chungin hlawh a la reng a. Thawk loa a hlawh lak hi a vaiin Rs. 17,35,183 a ni. A hnu ah Aptech Computer Education Deradun-ah bawk kum hnih chhung advance computer course a zirnaah pawh sawrkar sum hi hmanga puh a ni.
Hei bakah hian Julius Tongchangya ta ‘Julius Fish Seeds Production Center’ Udalthana-I chu sangha chi nuai 25 supply order, cheng nuai 50 man CADC-in a pe tih sawi a ni a. Sangha chi hi nuai 17 chauh, cheng nuai 34 supply in, cheng nuai 50 hi pek vek a ni lawi si tih, actual payee receipt-ah tarlan a ni.
Hei chauh hi niloin, leilet siamna atan Julius Tongchangya hi cheng nuai 1.6 man contract pek a ni a. Deputy chairman hlui Purna Muni Chakma chu Julius Tongchangya hnaa thuntu leh chawlh phalsaktu a ni. KK Tongchangya hi ama fapa ngei sum tam taka hlawkna a neih theihna atana tha thawhtu a ni, tiin court chuan an pathum hian thiam loh a chantir a. Kar kalta Zirtawpni khan court hian thutlukna hi siamin, jail-a dah nghal an ni a. Thawhtanni khan a hremna a tichhuak a ni.
Court chuan kum li theuh lung in tang tur leh cheng nuai thum theuh chawi turin a hrem a; sumfai chawi tur hi an pe thei lo a nih chuan thla 9 chhung lung in tanin an tlak ang. He thubuai kaihhnawiha lung in an lo tan tawh chu an tan hunchhung atan chhut tel sak turin a ti a ni.
Court-in hremna a pek dawna a ngaihtuah pawimawh zual nia special judge Dr HTC Lalrinchhana’n a sawi chu, mipui sumpai eirukna satliah ni lo, chhungkaw bil hamthatna tura ramchhung dan kuaihera mipui sumpai a lo thlawna luanral tirna a ni, a ti.
He thubuaia puh ber Kali Kumar Tongchangya hi hemi court vek hian eirukna thubuai dangah 2023 September 25 khan thiam loh chan tir tawhin, kum 4 chhung lung in tang tur leh cheng nuai 3 chawi turin a lo hrem tawh a ni.
Dik lo taka sawrkar sum hmannaa inhnamhnawihte kum 4 tang dawn
