Dik loa MR bill tum vbch.14 hum

Dik loa MR bill tum vbch.14 hum
Mizoram State Health Care Society chuan Mizoram sawrkar hnathawk, dik tawk loa medical reimbursement bill tumte dap chhuak a, a endikna atangin kum 2024- 2025 chhung hian cheng vaibelchhe 14 a hum (save) tawh.
Ningania Health & Family Welfare department hnathawh thlirhonaah hei hi sawi a ni a. Tunhnaiah MPSC-in doctor thar 9 a la thar a, National Health Mission atangin Zoram Medical College-a zir chhuak doctor 43 rawih mek an ni a. Mizoram sawrkar chuan health worker thar 100 lakna tur a phalsak tawh a, umzui mek a ni a, nurse thar lakna tur a pawmpui tawh tih sawi a ni.
Civil Hospital Aizawl-a kal (kidney) thlak ve theih dan tur dap mek a ni a. Mizoram sawrkar hnuaiah specialist leh superspecialists 169 an awm mek tih sawi a ni bawk.
Directorate of Hospital & Medical Education hnuaia damdawi inah khum (functional beds) 1057 a awm a. Directorate of Health Services hnuaiah khum 500 a awm. ZMC&H ah khum 420 a awm a, private hospital-te khum neih zat belhkhawm chu 1760 a ni.
Infant mortality rate-ah Mizoram chu kum hnih chhung India rama a hniam ber, pakhatna a ni tawh a. A rate chu 3 per 1000 live birth niin, thingtlang lama thawktute inpekna vanga ngaih a ni.
Mizoram College of Nursing chu NAAC ‘B’ grade nei a ni a, hetiang NAAC grade nei Nursing College hi India hmarchhakah pahnih chauh an awm nia sawi a ni.
Health & FW dinhmun:
8 ZMC & Hospital, Civil Hospital Aizawl leh Cancer Hospital pathum bakah district hospital 10, sub district hospital 2, community health centre 9, primary health centre 61, Urban PHC 10, sub centre 379, Ayushman Bharat Health & Wellness Centre 408, sub centre clinic 322 a awm a. Ayush Hospital pakhat, Nursing College pakhat, Nursing School pathum leh ANM school pali a awm.
8 Ministry of DoNER hnuaia NESIDS fund atangin hna hrang hrang – Civil Hospital Aizawlah Cardiology department tih changtlun a ni a; khum 100 awmna tur Kolasib District Hospital, khum 50 awmna Khawzawl District Hospital, khum 50 awmna Saitual District Hospital, khum 50 awmna Hnahthial District Hospital sak mek a ni.
8 Fund dang atangin khum 100 awmna Mamit District Hospital, Lunglei Civil Hospital Laboratory building leh type IV quarters unit 6 sak, Lawngtlai District Hospital-a Dialysis Unit din, sawrkar hospital hrang hranga Trauma Care Facilities thuamthat, CSR leh NESIDS sum hmanga Serchhip District Hospital kalpui mek a ni.
8 NHM hnuaiah ASHA 1091, Mobile Medical Unit unit 9, National Ambulance Service ambulance 62 an nei a. Kum 2023- 2024 chhungin Free Drugs Service Initiative hmangin a thlawnin damdawi cheng vaibelchhe 2 man hu sem a ni tawh.
8 Rilru (mental) lama harsatna neite tana engtiklai pawha biak theih Tele MANAS phone number- 14416 a awm. Mizorama Health department kaihhnawih tinreng thlenna (grievances & redressal) theihna portal – www.vahui.inand kalpui a ni.