Mizoram sawrkarin kum 2025-a police a lakah dan dik tak leh a tlingte chauh lak a nih avangin an lawm a. Kumina police lak leh turah pawh dik leh huaisen taka kal a, la zel turin sawrkar an ngen lawk tih police officer-te chuan an sawi.
Mizoram Police Subordinate Officers’ Association (MPSOA) thuchhuak chuan, Mizoram Police Manual 2005 hman hnuah a vawikhatna atan, kum 19 ral hnu kum 2025-a Mizoram Police Manual 2005 ang thlapa class-X (HSLC) pass chin constable atana lak an ni chu Mizoram Police tan hmasawnna mellung pawimawh tak a ni tih a sawi a. Training mek Mizoram Police constable 259 (unarmed /armed/ mechanic) laknaah party leh mimal induhsakna tel loa a tling leh titha lak an ni kha lawmawm an ti takzet tih a sawi.
Tuna SI (UB) post 25 recruitment kalpui mek, approval awm tawh recruitment la kalpui leh tur – SI (UB) 15 leh ASI (UB) post 10, ASI (M) 10, constable 350 (UB-150, AB-200) ah pawh dik tak leh huaisen taka kal turin Mizoram sawrkar an ngen tih a sawi a. Subordinate level rank hrang hranga post ruak – SI (UB) 62, ASI (UB) 33, constable 756 (UB), ASI (M) 120, MPRO (H/C 230, constable 32), F&ES 57 & constable (AB) 2757, a vaiin 4047 vel awm mek pawh hnawhkhah thuai a nih theihnan hma laksak turin state sawrkar a ngen tih a sawi bawk.
Tunhnaia Mizoram sawrkarin ‘Assistance to States and Union Territories for Modernisation of Police’ scheme kaltlanga Mizoram Police hman tur lirthei thar 219 a pe chu lawmawm an ti a. Ground level-a police hna bulpui ber thawktu police station, out-post leh beat post 60-in a ruala lirthei thar an dawng vek thei chu ropui an tih thu MPSOA hian sawiin, ‘Hei hian police tha nasa taka tichakin, rikrum thil, hnuchhuina leh sual dona kawngah khawi hmun pawh rang zawkin kan thleng thei tawh tur hi Mizoram sawrkar chungah lawmthu kan sawi a ni,’ a ti.
Heng hmasawnna thar tam tak Mizoram Police-in an neih theihna tura theihtawp chhuaha hmalatu Mizoram sawrkar hotute, a bikin chief minister, Home minister leh a thawhpui Home department officer leh staff-te chungah, Police Headquarters hotute – DGP, IGP Hqrs leh senior officer dangte leh staff-te chungah MPSOA Gen. Hqrs chuan lawmthu a sawi tih a sawi a ni.
Dik taka police lak vangin police lawm
