Aizawl Municipal Corporation chuan April 23 & 24 khan an hnuaia in sak dila enkawl tura in register engineer, architect leh supervisor 636 chu AMC office-ah kokhawmin in sak chungchanga an hriat tur tul an zirtir a, software an neih thar hman dan an zirtir bawk.
AMC municipal commissioner, administrator Joseph H Lalramsanga chuan, a dilna kim thlapa dawn a nih chuan, chawhrualin ni 12 chhungin in sak dilna pek hman a ni tih a sawi a. Dilna dik tawk lo a awm thin avangin siamtha tura a diltu engineer/ architect hnena thawnlet a tul fo thin avangin in sak phalna hi a chhuah har phah thin a, rang taka chhanna dawn a nih loh phei chuan in satu turin thla tam tak chhung a nghah chang a awm thin tih a sawi a ni.
AMC hnuaia in-register, technical person – engineer leh architect te chu tan la thar turin a chah a. AMC tihmingthatu an nih theih rualin tihmingchhetu an ni thei, tiin, diltuten rang taka permit an hmuh theihna tura an pawimawhna a hrilhfiah a, in sak dan tur siam, dilna thehluh, dilna bawhzui, permit a chhuah hnuah pawh in sak vil zui a, sak zawh thlenga enkawlpui chu an mawhphurhna a ni tih a hrilh a ni.
Deputy municipal commissioner K Vanlalruata chuan Online Building Plan Approval System thar (OBPAS 2.0) hman dan leh application thehluh dan a zirtir a. Tha zawka building regulation kenkawh dan tur leh chak zawka permit pekchhuah a nih theih dan tur sawiho.
AMC-a in sak dilna hi AMC hnuaia technical mi in-register te kaltlang chauhin a dil theih a, tunah architect 141, structural engineer 69, civil engineer 364, supervisor 43 leh construction firm 19 inziaklut an awm. Kumin chhungin AMC-in in sak phalna 490 a pechhuak tawh a ni.
Dilna dik kim thlapah in sak dilin ni 12 chhungin pe hman – Municipal commissioner
