Union Home Minister Amit Shah chuan major scheme pathum lai Rs 8,000 crore chuang senna tur state tina fire brigade tihchangtlunna tur te, tuilian venna tur te leh state 17-a leimin venna tur atana hman tur a puang.
State leh Union Territory a disaster management minister-te nena meeting neihnaah Shah chuan chhiatrupna avanga nunna chan an awm loh nana hma la turin ngenna a siam bawk a.
“Fire brigade service tihchangtlun nan State te hnenah Rs 5,000 crore pek a ni ang a. Ruahmanna kimchang siamin chu chu kan pe ang che u. Khawpuia tuilian awm thei laka inven nan a bik takin – Mumbai, Chennai, Kolkata, Bengaluru, Ahmedabad, Hyderabad leh Pune te tan Rs 2,500 crore pek an ni bawk ang” tiin a sawi a.
“State 17-a leimin nasa thin ven nan Central sorkar chuan Rs 825 crore a thehchhuak bawk ang,” tiin a sawi bawk a. Home Minister chuan chhiatna thleng avanga nunna chan awm loh nana hma la turin a ngen bawk a.
“Kan vaiin Prime Minister Narendra Modi kaihhruaina hnuaiah chief minister tin ten theihtawp an chhuah a. Nasa zawka hma lam pan tura kan la thawhrim zual a ngai a ni,” tiin a sawi.
Shah chuan National Disaster Management Authority (NDMA) te chuan nuclear power station pasarih bunna state te chu an tlawh tawh thu sawiin heng state te hian ruahmanna khauh zawkin an kalpui ang a ti bawk a.
“Heng state te hian ngai pawimawh se ka duh a. Nuclear power plant te hman a niha power a siam chhuah hmain chhiatna awm thei lakah invenna fimkhur tawpa kalpui hmasak tur a ni,” tiin a sawi bawk.
Shah chuan tun hnai kum kua chhungin central sorkar leh state te chuan disaster management lamah hlawhtlinna nasa tak an nei tia sawiin chhiatrupna thleng thin te chu a ziarang a inthlak thin avangin inthlahdah theih a ni lo va, a nasa tial tialin a lang bawk tiin a sawi a.
“Hei vang tak hian invenna lamah kan inhmakhua that a ngai a. Disaster management hi kan ramah thil thar a ni lo,” tiin a sawi bawk.
Disaster ven nan sum tam zawk pe chhuak
