Hmun kilkhawr bera chengte tan pawha HIV/AIDS a mahni dinhmun enfiah theihna tur, Mizoram State AIDS Control Society (MSACS) ta Mobile Integrated Counselling & Testing Centre (ICTC) chu Thawhlehni khan district pasarih tan Health minister Dr R Lalthangliana chuan Aizawlah a vailiam.
Mizoram chu HIV/AIDS vei tamna leh cancer hluarna state a nih avangin beihpui thlak a ngai tih Health minister hian a sawi a. Chutih laiin, ram pum leh state chhung mipui nawlpui hriselna tehfung pawimawh tak Infant Mortality Rate (nau piang 1000 zela nausen kum khat hnuailam thi zat) ah a ti \ha ber (thi tlemna) state kan ni, tih a sawi. Tuna Mizoram run mektu HIV/AIDS leh cancer te chu tanhoa beihpui thlak tak tak chuan hneh theih a ni, tiin, Mobile ICTC chu hmun tinrengah a pawimawh dawn tih a sawi a ni.
Minister sawi danin, Mobile ICTC hi district tinah National AIDS Control Organisation (NACO) in a phal angin lirthei leh counsellor, laboratory technician leh driver-te pek vek an ni a. NACO district 7 tan lirthei thar lei theih a ni a; Health department-in district a then dan – Aizawl East, Aizawl West, Mamit, Kolasib, Champhai, Serchhip leh Lawngtlaiah te dah phawt niin, tun ami bak hi kum 2023-2024 chhunga lei atan district dang tan pawh lirthei hi dil mek a ni a, a thuphung chuan NACO hian a pawm tawh.
Mobile ICTC hi District Hospital bakah PHC leh CHC-a ICTC pan thei lo tan a tangkai dawn tih sawiin, “Mi harsa zawkten health facilities an chhawr ve theihna hmanraw pawimawh tak a nih avangin a hlu hle a ni,” a ti. Lirtheite hi MSACS project director leh BSD Division hotuten Global Fund atanga harsa taka an dil chhuah a nih avangin a enkawltute pawhin dimdawi leh duat taka enkawl a pawimawh hle dawn tih Dr R Lalthangliana hian a sawi.
Mizoramah HIV/AIDS finfiah (confirm) theihna hmun ‘Stand Alone ICTC’ hi hmun 41-ah a awm tawh a, Aizawl district-ah hetiang hmun hi a tam tawh laiin district dangah chuan hmun 4/5 chauhah a awm. HIV/AIDS chungchangah mahni dinhmun hre turin thingtlang kilkhawr atangin District Hospital pan vang vang ngaihna hmun a awm thin a, heng harsatnate hrethiamin NACO chuan Mobile ICTC hi district zawng zawng tan 2006- 2008 khan MSACS kaltlangin lei a lo ni tawh a. Mahse heng lirtheite hi a upain a chak tawh lo a, vawi tam NACO-a a thlakna tur dil a nih hnuah 2022- 2023 sawrkar kumah khan Global Fund Grant hnuaiah mobile ICTC sanction hmuh a ni ta a ni.
MSACS hian Mobile ICTC service a tan tirh atangin standard operating procedure leh guidelines fel tak duan sa a nei a. Hemi ang hian kalpui a ni.
2023- 2024 sawrkar kum chhung hian Siaha leh Lunglei district Mobile ICTC-te thlakna tur lirthei thar dilna NACO-ah thlen a ni tawh a, a thu chuan pawm tawh niin, final approval dawn a nih hunah a taka bawkzui nghal a ni ang tih department hotute chuan an sawi.
District 7 tan Mobile ICTC thar nei
