Daily Newspaper

District Covid kaihhnawihah harsatna liantham la tawk lo

13

Aizawl district tih loh district dang 9 (Lawngtlai tel loin) bawrhsapte leh chief medical offcer-te chuan Zirtawpni khan Health minister Dr R. Lalthangliana hoin Covid-19 kaihhnawihah video conferencing an nei.

Thutkhawmah hian Lunglei district tih loh district dangahte chuan inkharkhip bur a nih loh thu bawrhsap-te hian an sawi a. An district dinhmun an thlirin mipuiten sawrkarin inkaihhruaina dan a siamte an zawmtha a, harsatna liantham an la tawh loh avang leh hri inkaichhawnna an la thunun thei nia an hriat avangin hri inkaidarh lohna tura sawrkarin zawm tur a tih zawm chungin fimkhur takin dawr pawh hunbi tuka an hawn thu an sawi. Boruak awmdan azirin rang taka containment puan thin a nih thu te, district 6-ah chuan containment zone puan mekna a awm loh thu te sawi a ni.

Lunglei district-ah erawh chuan tunhnai kar hnih chhunga Covid-19 hri kai thar an pun nasat avangin hri inkaichhawnna chhutchah a nih theihnan khauh taka inkharkhip bur a nih thu sawi niin, thingtlang khua pahnih telin containment zone hmun 11-ah puan mek a ni.

District tinin sample test-ah harsatna an neih loh thu an sawi a. Lunglei district-ah Dawn khuaah mass testing neih a ni a, district dangah chuan sample test ngai chu harsatna awm loa an la inendik thei a ni. CCC leh CCCC chungchangah harsatna tawk an la awm lo a, vaccine pekchhuah pawh tluang taka kalpui vek niin, hmun thenkhatah erawh chhan hrang hrang vanga vaccine la ngam lo an awm tih sawi a ni.

Health minister chuan district tin ten Covid-19 dona kawnga hma an lak danah lawmawm a tih thu a sawi a. Hri danna pekchhuah kawngah theihtawp chhuah chhunzawm zel turin a chah. India rama vaccine pe kim hmasa ber state ni turin anmahni bial theuhah tan la turin a chah a ni. Sample endik kawngah hri inkaichhawnna dan chah a nih theih nan a tul dan azira sample endik bei ngawrh turin a chah a, sample test kit (RAgT) ah harsatna a awm loh thu sawiin, an mamawh ang zat la thuai thuai zel turin a chah a ni. Covid-19 thawh thumna lo thleng thei nia sawi laka inbuatsaih tura inhriattirna an chhuah tawh angin, district tinah naupangte enkawlna tur ruahmanna siam turin a chah bawk. PM Cares hnuaiah district tinah oxygen plant dah tum a nih thu leh, Mizoram sawrkarin cheng vaibelchhe 6 vel a sen ve a ngaih tur thu a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy