Daily Newspaper

District hrang hranga inthlan result hriat

33

Mizorama village council 558 awmah August 27 khan VC 550-ah inthlan kalpui a ni a, VC dang 8 hi Covid-19 hrileng kaihhnawihah inthlan hun sawn a ni thung.

Inthlan ni-ah vote thlak zawk hnu atangin vote tla chhiar zui nghal a ni hlawm a. Vote thlak hun zawng rei dan leh vote tla a tam dan azirin polling station hrang hrangah vote chhiar hun hman erawh a inang lo hlawm a ni.

VC tamna ber leh intlawhpawh leh inbiakpawh harsatna hmun zing ami Aizawl district-ah chuan vote tla zawng zawng puahkhawm hun chhung a duh rei ber a. He chanchin buatsaih lai hian a kimchang hriat ala ni lo.

Tun tum, village council inthlanpui 2020 neihna district dang 8-ah erawh vote tlak dan leh political party tin ten sawrkarna (majority) an lak dan te, sawrkar siam thei bik awm lohna te chu tlai dar 6 hmalamah a hriat theih hlawm a ni.

Mamit district-ah VC inthlanpui chu boruak muanawm tak hnuaiah tluang taka neih zawh niin vote tla zat hi za zelah 81.2 a ni. Mipa 22852 leh hmeichhia 22044-in vote an thlak a. Vote tla zawng zawng hi a vaiin 44896 niin 68.18% a tla a ni. Tripura Transit Camp-a voters leh uncontested vote chhiar tel loha vote tlak dan hi 81.2% a ni. An district-a vote tlak thatna ber chu Lengte niin za zelah 92.89 a ni a; vote tla tlem berna chu Saithah niin zaah 22.43 a ni. Voters awm zawng zawng hi 65852 niin VC 90 bakah sub village 11 a awm.

Mamit district-ah hian VC 90-a seat awm zawng zawng hi 394 niin, general seat 299 leh reserved 95 a ni a. BJP-in seat 11, INC-in seat 112, MNF-in seat 227, ZPM-in seat 13 la in, independent candidate-ten seat 31 an la. MNF pary chuan VC 56-ah hnehna a chang a, Congress-in VC 19, ZPM-in VC pakhatah sawrkarna a siam a, indepenent candidate sawrkarna siamna tur VC 3 a awm a, chak bik awmlohna VC 11 a awm .

Kolasib district election officer Dr H Lalthlangliana chuan an district-a village council inthlan hlawhtling taka kalpui a ni tih a sawi a. Inthlan hlawhtling tak neih theih nana theihtawp chhuahtu sector magistrate, polling officials, MPF, VLTF, media leh voter-te thuawihnaah lawmthu a sawi.

Kolasib district-a vote 60666 awm atangin vote 44589 a tla a, za zelah 73.5 a ni. Mipa vote 29451 atangin vote tla hi 21427 a ni a, zaah 72.75 a ni. Hmeichhe vote awm 31215 atangin 23162 a tla a, zaah 74.2 a ni. Hortoki-ah voter tam berin 2777 an awm a, vote 1499 ( 53.98%) a tla a ni. Voter tlemna ber Saihapui ‘V’ ah 85.38% tlain, voter 171 atangin 146-in vote an thlak a ni.

Mihring awm zat atanga chhut a vote tlak thatna ber chu Mualkhang VC-ah a ni a, vote nei 313 zing a 281 ten vote an thlak a, hei hi za zelah 89.78 a ni. Kolasib district-a VC 56-a inthlannaah MNF tlinna VC 32, INC 11, ZPM 3, independent 2 leh insiamrem ngaihna VC 8 a awm a ni.

Khawzawl district-a village council 38 awmah MNF-in VC 22-ah hnehna a chang a, ZPM-in 5 la in INC-in 3 a la a, independent candidate in VC 1-ah hnehna an chan bakah chak bik awm lohna VC 7 a awm.

Khawzawl district-ah hian VC seat 156 awmin general seat 114-ah MNF-in 73, INC 19, ZPM 19, independent-in seat 3 an la. Hmeichhe tana seat hauhsak 42-ah MNF-in 25, ZPM 8, INC 7, independent-in 2 an la a ni. A pumpuiah MNF-in seat 98, ZPM-in seat 7, INC-in seat 26, independent-a dingten seat 5 an la.

Khawzawl district-ah hian VC 38 awmin polling station 38, polling booth 52, VC seat 3 awmna 21, seat 5 awmna 13 leh seat 7 awmna 4 a awm a. Voters 26233 awmin 20268-in vote an thlak a, vote tla hi 77.26% a ni. Mipa voters 13141 atangin 10239-in vote an thlak a, hmeichhe voters 13092 atangin 10029-in an thlak. An district-ah hian Vankal-ah vote a tla thla ber a, voters 250 atangin 233-in vote thlakin 93.20% a ni.

Hnahthial district-a VC 30-ah inthlan buatsaih a ni a, Hnahthial South-III leh New Kawnpui te chuhtu awm loin MNF candidate-te an tling nghal. He district-ah hian voters 20614 awmin vote thlak hi 16073 an awm a, za zelah 77.97 a ni.

Khaw 32 awma khaw 22-ah MNF party-in majority neiin, INC-in khaw 8-ah, ZMP leh independent candidate-te khaw khat ve veah an awm thung.

Lunglei district-a VC 113-a inthlan buatsaihah vote tla hi za zelah 76.59 a ni. Voters 87773 awm atangin 67225 -in vote an thlak a; mipa voters 43745 atangin vote thlak 33326 an awm. Hmeichhia voters 44028 awm atangin 33899-in an thlak a ni. Vote tlak that berna chu vote 122 awmna Hlumte niin 121 (99.18%) a tla a; vote tlak hniam berna chu vote 455 awmna Upper Lungrang ‘S’ niin 159 (34.95%) a tla a ni.

Lunglei district-a VC 113-ah hian VC 54-ah MNF party-in majority neiin, INC-in VC 30, ZPM 8 a ni a, VC 20-ah majority nei party an awmlo. VC pakhat (Zodin) result la chinfel ngai a awm bawk a ni.

Champhai district-a vote tla zat chu za zela 75.03 a ni a. N.Khawbung Polling Station-ah vote tla tha berin zaa 91.10 a ni. Vote za zela 65.53 tlakna Champhai Electric Veng Polling Station-ah vote tla percentage a hniam ber a, vote zaa 80 chin chunglam tlakna polling station 20 a awm a ni. He district-ah hian MNF-in seat 163 a la a, Congress-in 66, ZPM-in 15 an la a, independent candidate chakna seat 15 a awm bawk a ni.

Champhai district-a VC 62-ah MNF-in VC 38 ah hnehna a chang a; INC-in VC 7, ZPM-in VC 5 ah , independent-in VC 2 ah hnehna changin, party mal chak bik awmlohna VC 10 a awm a ni.

VC 54 awmna Serchhip district-ah chuan MNF-in VC 34-ah hnehna a chang a, ZPM 6 , INC 9-ah hnehna an chang. Serchhip district puma vote nei zat chu 47070 niin mi 37,920 ten vote an thlak a, za zelah 80.56 a tla a ni.

VC 44 awmna Saitual district-ah chuan MNF-in VC 27-ah hnehna changin, INC leh ZPM-in VC 4 ve ve an chang a, independent-in VC pathumah hnehna changin party mal chak bik awmlohna VC 6 a awm a, vote zaa 76.05 a tla a ni.

He chanchin buatsaih lai hian Aizawl district-a village council inthlanna chu phuahkhawm fel ala ni lo a, Aizawl district-a VC inthlanah hian vote nei 52036 (mipa- 29041 leh hmeichhia 30323) awmin vote 40260 a tla a, percentage hi 77.37 a ni. Mipa vote thlak zat 20161 a ni a, hmeichhia vote thlak zat 20099 a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy